LH Apoiu MOP Nia Deklarasaun; “Projeitu Fiziku Tenki Iha Konesementu MOP”

.

Jornal Timor Post - Sabadu, 11 Maiu 2013 

Organizasaun Non Govermetais Luta Hamutuk (LH) apoiu komitmentu Ministru Obras Publiku (MOP) Gastao de Sousa ne’ebe anunsia ona ba publiku katak, Projeitu fiziku hotu ne’ebe implementa tenki iha konesementu husi MOP. 

Tuir Luta Hamutuk nia haree, seriedade no komitmentu Ministeriu Obras Publiku (MOP) diak, tanba identifika ona projeitu barak ne’ebe implementa ona iha governu anterior ne’ebe lidera husi eis Ministru Pedro Lay no Sekretariu Estado Obras Publiku (SEOP) Domingos Caero barak mak laiha kualidade maibe pagamentu lao tiha ona. 

 “Ho komitmentu MOP nia ne’e, ami sosieade sivil apoiu tebes inisiativa no komitmentu MOP Gastao de Sousa atu kontinua mantein nia prosesu tomak, no husu Komisaun Anti Korupsaun (KAK) atu investiga eis MOP Pedro Lay, no Domingos Caiero tanba projeitu barak iha IV Governu nia tempu implemnta laiha kualdiade no ba projeitu abandona maibe pagamentu lao ona,” Deputi Luta Hamutuk Joazito Viana ba Timor Post, liu husi telephone, Sesta (10/5) relasiona ho deklarasaun MOP Gastao Sousa ne’ebe hateten, hahu Maiu ba oin projeitu fiziku ne’ebe implementa tenki iha konesementu husi MOP. 

Oportunidade ne’e, rekomenda ba MOP Gastao Sousa tenki mantein komitmentu, karik atu lori dezenvolvimentu infraestrutura ba oin, maibe keta haluha tenki husu KAK investiga husi MOP anterior. 

Antes ne’e, Gastao de Sousa alerta ba publiku katak hahu tinan ne’e ba oin projeitu hotu ne’ebe imlementa tenki iha konesementu ba MOP, nune’e fasil ba MOP hodi halo kontrola. 

.