La Halo Kna’ar Ho Diak: “La Sama: Mosu Remodelasaun Iha V Governu”

.

Jornal Timor Post - Kuarta-Feira, 15 Maiu 2013 

Vice Primeiru Ministru (PM), Fernando La Sama de Araujo deklara Primeiru Ministru sei halo remodelasaun ba estrutura V Governu Konstitusional, enkuantu membru Governu sira la halo kna’ar ho diak. 

“Deklara Primeiru Ministru katak, Governu hadia uma laran ne’e signifika, hadia displina, jestaun, komportamentu, problema moralidades no seluk tan, deklarasaun ne’e nia sentidu katak, se la diak troka, diak fo apoiu nafatin ka iha komitmentu boot ita presiza hanoin dudu nafatin ba oin,” La Sama ba jornalista sira hafoin halo ezersisiu multi-setoral iha Tasi-Tolu, Tersa (14/5). 

La Sama hateten, ezekusaun ne’e atu hadia diak liu tan jestaun no kualidade servisu iha 2013 no planu ba 2014. 

“Ezekusaun hadia jestaun ne’e mak lori ba kualidade, ne’ebe hau hanoin ba 2014 sei halo buat lubuk ida, ne’e orden Primeiru Ministru nian iha 2013,” haktuir La Sama. Hadia uma laran ne’e, hadia jestaun, eleva konesementu tekniku, eleva kapasidade rekursus humanus Timor ninian, ida ne’e mak Primeiru Ministru hakarak hateten hadia uma laran, haktuir La Sama. 

 Iha parte seluk La Sama mos hateten katak, dezenvolvimentu atu lao diak tenki iha regras, tanba lao ho regras mak bele kontrola hodi garantia kualidade implementasaun projeitu. La Sama ameasa katak, projeitu ne’ebe laiha despaisu no konesementu husi MOP, ADN no Primeiru Ministru Governu sei la selu. 

 “Hau konkorda Ministru gastao, katak projeitu hotu tenki iha konesementu MOP, inklui ADN, nune’e bele iha kordenasaun par abele garantia kualidade projeitu ne’ebe laiha konesementu, maske implementa ona, maibe Governu sei la halo pagamentu,” dehan La Sama. 

Atu garante projeitu hotu lao tuir regras, no iha kualidade, La sama sujere ba MOP tenki fortifika nia estrutura ba to’o baze. 

 “Ami deskute hela asuntu ne’e ho MOP, haree hela iha 2014 sei fortifika nia estrutura to’o baze, par abele tau matan ba projeitu ne’ebe implementa iha Distritu hodi bele kontrola kualdiade,” haktuir La Sama.

.