Kona-Ba Lori Lucia Ba Estranjeiru “PD- FRETILIN La Konkorda, CNRT Suporta”

.

Jornal Timor Post - Kinta-Feira, 16 Maiu 2013 

Intensaun Prizioneiru Lucia Lobato atu halo tratamentu saude iha estranjeiru hamosu politimia iha Parlamentu Nasional, deputadu husi partidu Demokratiku (PD) no FRETILIN la konkorda maibe husi partidu CNRT suporta. 

Virgilio Honai, Deputadu PD no Joaquim dos santos husi FRETILIN, ho malorek de’it deklara, lori ka husi prizioneira husi kareira politika, halo tratamentu saude iha estranjeiru, hatudu hahalok injustica. 

“Ne’e hamosu injustica ba prizioneiru sira simples, se bele, haruka doutor espesialista halo tratamebtu de’it iha rai laran, Doutor espesialista maka haree diagnostika, no bele informa katak moras ne’e grave ka lae, atu rujuk ba rai liur,” deputadau Bergilio Hornai, esplika ba Diariu Timor Post iha Parlamentu Nasional, Dili Kuarta (15/5). Maske nune’e, Hornai kontinua dehan, Lucia Lobato ne’e ema rezistensia ida, durante ne’e, nia nunka halo problema boot id aho justisa. 

 “Karik ita tauk maka prizioneira bele halai, maibe Lucia ne’e mai ho familia ida ke famozu ho istoriku rasik,” nia esplika. Se karik tenki lori duni ba estranjeiru, presiza iha koordenasaun diak interminesterial. Iha sorin seluk, Deputadu Joaquim dos santos husi Bancada FRETILIN hateten, Ministeriu Justisa tenke halo tratamentu hanesan ba prizioneiru sira, tanba prizaun hanesan fatin preparasaun moral, saude no mental, atu bele kura hahalok at, dezultadu hahalok diak. Bainhira Governu husik Lucia Lobato ba estranjeiru, entaun tenki halo mos ba prizioneiru seluk, ne’ebe moras hanesan ne’e, tanba iha konstituisaun hateten, sidadaun hotu iha lei nia okos. 

“Se Lucia halo tratamentu iha liur, ne’e hamosu injustica social ba povu ki’ik sira,” Joaquim dehan tan. Entertantu, deputadu mateus de Jesus, husi Bancada CNRT hateten, iha lei konstituisaun RDTL artigu 57, garantia sidadaun nia direitu atu hetan asistensia saude. 

 “Ne’ebe Governu bele loke dalan ba prizioneira Lucia Lobato halo tratamentu iha rai liur, no bele haree orsamentu ruma atu halo transfere pasiente ba liur ne’e iha ka lae?,” nia hateten. 

Prizioneiru laos kestaun ketak ida, tanba lei garante sidadaun hotu iha direitu atu hetan tratamentu diak,” iha lei mos la dehan hanesan Indonesia nia karik, Penjara seumur hidup,” tenik deputadu Mateus. 

Deputadu Mateus deklara ida ne’e, tanba iha Governu uluk, akontese tiha ona transferensia pasiente ba liur, to’o hetan tan livre husi prizaun. “ne’e komunidade duvida, tanba iha duni razaun, maibe fila fali ba ita nia konsensia atu ajuda ema seluk nia moris, mesmu nia halo sala ruma,” dehan nia. 

 Enkuantu, Ministru saude Sergio Lobo hateten, agora Politika Ministeriu saude halo negosiasaun ho Indonesia, antes transpere pasiente ida, mediku sira tenki hatene uluk moras saida no halo kalkulu ba orsamentu ne’e hira. 

“Maibe halo tiha tratamentu fila mai Timor, tenki relata ba Ministeriu liu husi HNGV, esperensia iha pasiente balun la halo relatoriu,” Ministru informa. Ministeriu hadia hela sistema transferensia, liu husi kontaktu entre departementu, ba futuru laos ona Ministru saude mak haruka ba rai liur, maibe HNGV. 

,