“Komunidade: Miss Timor Mosu Sedu Liu”

.

Jornal Independente - Sesta-Feira, 10 Maiu 2013 

Komunidade no estudante sira fo sira nia hanoin katak, Programa Miss Timor Leste 2013 ne’ebe mak Ministeriu Turismu no Kultura (MTK) realiza ne’e sedu liu, tanba infra-estrutura turismu no feto rural sira barak maka sei abandonadu. 

Entertantu, antes ne’e Ministru Turismu no Kultura, Francisco Kalbuadi hateten, kontinua avansa programa ne’e tamba hetan apoiu husi Primeiru Ministru Xanana Gusmao. 

 Maioria husi bancada Partidu iha Parlamentu Nasional (PN) no sosieade sivil kontra programa ne’e, tanba la oresponde ho situasuan ekonomia povu nia no infra-estrutura turismu iha rai ne’e. Deolindo Mangalahes Fernandes (25), Estudante UNTL, Fakuldade Agrikultura hateten, governu atu implementa Miss Timor leste ne’e, tenki hadia uluk turismu, aliende ne’e, Ambiente Timor leste, liuliu kapital Dili mos seidauk bele garante ba ema estrajeiru. 

Tuir nia katak, diak liu governu utiliza osan hamutuk rihun U$200.000 hodi hadia fatin turizmu, atu nune’e, nasaun Tl bele sai diak liu tan. Cristovao Mendonsa (21), estudante lian Korea do Sul, hateten programa Miss Timor ne’e sei la fo vantazen ba nasaun no povu ida ne’e, tanba area turizmu seidauk dezenvolve diak, nia sujere atu governu hadia uluk fatin turismu atu nune’e bele atrai nasaun liur mai vizita TL. 

Iha sorin seluk, komunidade Domingos Pereira (21) fo hanoin katak, diak liu mak Governu tenki hanoin didiak lai wainhira atu implementa programa ne’e, tanba ita hare ba seitor turizmu nian seidauk dezenvolve diak, hodi bele dada ema turista mai vizita Tl, husu governu tenki tau atensaun uluk ba kondisaun infraestrutura. 

Nune’e mos, Estudante IOB Frederica Monica mos lakonkorda programa Miss Timor ne’e tamba gasta deit osamentu estadu. “Miss Timor Leste ne’e hau hanoin sei la fo benefisiu ba povu, liu-liu ami estudante sira, Nusa M Inisteriu Turizmu la hare ba konstrusaun Turizmu ne’ebe sei aat hela, no hare ba povu kiik sira ne’ebe sei enfrenta problema barak hanesan nesesidade moris loro-loron,” dehan nia.

,