Komponente Naval Kontinua Infrenta Problema “PR Taur Preokupa RH”

.

Jornal Nacional Diario - Kinta-Feira, 16 Maiu 2013 

Brigadeiru General das FALINTIL-Forca Defesa Timor Leste (F-FDTL), Filomeno Paixao, informa katak, to’o oras ne’e komponente Naval kontinua infrenta problema akomodasaun, garajen no manutensaun ba Ro Parulla nian. 

Filomeno Paixao hateten lia hirak ne’e ba Jornalista sira iha Palasiu Prezidensial Aitarak-Laran, Dili, Kuarta (15/5), hafoin hasoru malu ho Prezidenti da Republika (PR) Taur Matan Ruak hodi informa servisu F-FDTL nian ba xefe Estadu. 

Brigadeiru Jeneral ne’e hateten, to’o oras ne’e dezenvolvimentu iha F-FDTL laiha mudansa barak, maibe iha preokupasaun ne’ebe iha ohin loron maka parte komponente Naval nian iha nivel hotu-hotu. Husi Preokupasaun ne’e, Brigadeiru Jeneral ne’e hateten, parte F-FDTL propoin ona ba Governu liu husi Sekretariu Estadu Defesa (SED) atu bele tau matan. 

Nune’e, iha enkontru ne’e, Prezidenti Republika Taur Matan Ruak mos hato’o preokupasaun kona ba Rekursu humanus Timor Leste nian, tanba remata tiha lisensiatura maibe la hala’o servisu ho kualidade, laiha patriotizmu no la iha nasionalizmu. 

 “Rekursu humanus ita koalia laos ba hasai S1, S2, S3 ne’e la interese, rekursu umanus ne’ebe mak ita interese maka ho kualidade, ho integridade, seriu, labele halimar, iha patriotizmu, iha nasionalizmu para atu halo traballu ne’e sai diak, ida ne’e mak dehan rekursu humanus, laos S1, S2, S3, ne’e barak nein servisu ita haree la diak, laos ita dehan buat hotu-hotu la diak mas iha buat balun mak lao depende deit ba ita nia formasaun akademiku, ne’e preokupasaun husi Prezidenti nian,” dehan Brigadeiro Jeneral Filomeno Paixao. 

Nia hatutan, problema rekursu humanus laos instituisaun F-FDTL deit mak infrenta, maibe iha instituisaun hotu-hotu infrenta mos situasaun ida ne’e, tanba ne’e formasaun ba rekursu humanus ne’e importante tebe-tebes. Aliende ne’e, Sefe EStadu mos sujere ba F-FDTL, PNTL, Seguransa Civil atu treinu baziku hamutuk. 

 “Formasaun Forsa nian katak, iha ne’e ba oin hanoin ba halo nusa tanba ita nia konstituisaun nasional hateten katak F-FDTL tenki servisu hamutuk ho Polisia ho Forcas Civil nian,” dehan Filomeno Paixao. 

Brigadeiru general ne’e mos husu, ba oin Governu no Estadum tenki koalia hamutuk hodi nune’e bele desidi ba forsa no seguransa tolu ne’e atu treinu hamutuk iha fulan rua ka tolu nia laran. 

Tuir Filomeno Paixao katak, PR Taur nia hakarak mak iha treinamentu integradu baziku nune’e bele hamutuk iha situasuan ruma ho dutrina integradu ida.

.