“Kompania Balun Abandona Projetu”

.

Jornal Independente - Tersa-Feira, 14 Maiu 2013 

Bazeia ba rejultadu fiskalizasaun Komisaun E Parlamentu Nasional ba asuntu infra-estrutura nota katak, kompania ENSUL abandona projetu Ponte Taroman, Sub Distritu Suai, Distritu Covalima. 

Membru Komisaun E, Deputadu Inacio Moreira dehan, Projeitu ne’ebe gasta orsamentu hamutuk millaun U$3 resin ne’e abandona hela. 

 “Ami iha kuarta-feira (8/5) ba to’o iha Taroman, fatu-Lulik, ami haree projeitu ne’e serviso abandona hela, maibe gasta orsamentu hamutuk miloens tolu resin,” hateten Inacio iha sasaun plenaria, PN (13/5). Deputadu ne’e kestiaona mos kona ba projetu estrada ne’ebe liga Oeleu ba Tilomar ne’ebe gasta orsamentu Millaun U$4. 

Tuir nia, kompania Marabia Lda ne’ebe kaer obra ne’e halo deit estrada husi Oeleu to’o Tapo la to’o iha Tilomar. Aleinde ne’e, Inacio informa kona-ba kondisaun Ospital iha Sub-Distritu Fatu-mea, distritu Covalima, ne’ebe loro-loron uza kareta ambulansia hodi ba lalin bee mos atu bele uza iha Hospital ne’e. 

“Hau ba koalia ho Doutor sira no Administrador ami ba haree bee-matan ne’ebe mak iha bomba ne’e monta hela maibe la funsiona, tanba ne’e mak komunidade sira iha fatin refere laiha bee moss hodi konsume,” dehan Inacio. 

 Iha Suai Vila, nia informa, pagamentu ba kompania ne’ebe kaer projeitu bee moos hotu ona, maibe to’o ohin komunidade la asesu bee moos. 

Projeitu bee moos ne’e rasik, nia dehan gasta orsamentu kuaze rihun US$200, maibe laiha rezultadu pozitivu. Iha fatin hanesan, deputadu husi PD Paulino Monteiro afirma katak, projeitu barak iha Distritu Covalima mak abandonadu.

.