“Kalbuady: Programa Miss Timor Desizaun Final Iha PM Xanana Nia Liman”

.

Notisia Husi TVTL - Kuarta-Kalan, 08 Maiu 2013 

Ministru Turizmu hasoru malu ho Komisaun D Parlamentu Nasional (PN) hodi esplika kona ba programa Miss Timor ne’ebe atu hala’o tinan ida ne’e. Programa Miss Timor ne’e hamosu polimika boot iha komunidade nia leet, maske seidauk realija. 

 Terca-feira ne’e Minitru Turizmu Francisco Kalbuady marka prezensa iha Komisaun D PN hodi esplika kona ba programa Miss Timor Leste ne’ebe atu hala’o iha tinan ida ne’e nia laran. Membrus komisaun D Josefa Pereira no Joaquim dos Santos tamba sa mak Ministru Turizmu realiza programa ida ne’e, nusa la fo ba seitor privadu sira. 

“Razaun saida mak Ministeriu Turizmu sai fali hanesan promotor ba eventu ida ne’e,” dehan Josefa. 

“Ministeriu Turizmu loloos kapasita seitor privadu maka hola parte iha promosaun ida ne’e,” dehan Joaquim dos Santos. Nune’e Francisco kalbuady esplika katak, so Ministru Turizmu mak fo rekomendasaun no seidauk iha setor privadu balun ne’ebe iha interese ba programa ida ne’e. 

 “Miss Timor tenki hetan rekomendasaun husi Ministeriu Turizmu, segundu, sira ne’ebe maka seitor privadu tuir ami nia hare e ami seidauk identifika katak, tamba programa ne’e foun, ita hotu-hotu mos foun, se karik iha tinan 2 ka 3 nia laran, laiha problema,” dehan Kalbuady. Nune’e mos Aurelio Freitas ne’ebe hanesan komisaun D Parlamentu Nasional husu atu hadia lai programa ne’e hodi bele prepara diak liu tan. 

“Ita presiza kondisaun, iha perioridade to’o agora kondisaun seidauk diak, hatudu katak Timor seidauk pronto halo buat ne’e,” dehan Aurelio. Hata’an ba kestaun ne’e, Francisco Kalbuady esplika katak, desizaun final iha Primeiru Ministru Kay Rala Xanana Gusmao nia liman. 

Hanesan membru governu pronto tuir ordem Xefe do Governu nia. “Prontu rna orientasaun husi Primeiru Ministru maibe husu atu orgaun sira hotu respeita malu,” dehan kalbuady. Joaquim dos santos mos hato’o proposta balun mai husi sosiedade sivil ne’ebe la konkorda ba programa Miss Timor ida ne’e. 

 “Iha grupu husi sosidade sivil balun kestiaona Miss ne’e, Ministeriu Turizmu nia opiniaun oin sa? Opiniaun ne’e rajuavel ga oinsa,” dehan Joaquim. Francisco Kalbuady esplika katak, hanesan nasaun demokratika ema hotu iha direitu atu hato’o sira nia opiniaun, maibe tenki respeitu mos ema seluk nia ideas. 

“Buat ida hau husu, demokrasia ida ne’e respeita malu, grupu ida kontra no grupu ida pro, agora hau nuudar Ministru hau tenki halo programa, hau laiha forsa nein oituan atu hapara sira, tanba sira hakarak, parte seluk grupu balun lakohi, hau desde prinsipiu hau dehan ba Primeiru Ministru diak liu altera deit, aban bain rua mak realiza fali, ne’e hau nia opiniaun privadu, depois PM hare hotu opiniaun sira ne’e, tamba ita hotu-hotu konsenti hanesan Timor oan hotu-hotu fo opiniaun kapas tebe-tebes, ne’ebe nu’udar Ministru hau tenki rona ema hotu-hotu idea,” dehan Kalbuady. 

Hafoin remata diskusaun, Prezidenti Komisaun D hato’o katak desizaun ba problema sira ne’e sei lori ba plenaria Parlamentu Nasional hodi desidi. “Liu husi diskusaun ida ne’e ami sei hato’o ami nia relatoriu ba plenaria deois plenaria mak sei desidi, atu halao ita boot sira nia aktividade ne’e ga lae,” dehan Presidenti Komisaun D. Programa Miss Timor oras ne’e sai polimika boot iha komunidade nia leet, tamba hanesan programa foun iha nasaun foun ida ne’e tamba ne’e ema barak sei duvidas ho nia prospektiva ba oin. 

,