“Kalbuadi Adia Miss Timor”

.

Jornal Timor Post - Sesta-Feira, 17 Maiu 2013 

Ministru Turizmu (MT), Framcisco Kalbuadi Lay sei adia programa Miss Timor Leste ne’ebe mak tuir loloos hala’o iha loron 26 fulan maiu 2013. 

Koordenador eventu Miss Timor ba tinan 2013 informa ba Timor Post iha sentru Konvensaun Dili (CCD) hafoin partisipa iha diskusaun planu annual 2014 hateten, programa Miss Timor sei adia ba fulan hirak mai oin. 

“Ministru foin lalais fo sai katak, programa Miss Timor sei adia fali ba fulan Agustu maka hafoin hala’o fali,” hateten koordenador Aderito Babo iha CCD, Kinta (16/5). 

Koordenador ne’e hateten, tanba mosu pro no kontra iha sosieade no politiku nain sira iha Parlamentu nasional, tanba ne’e sei bolu hamutuk ekipa hirak ne’e, neebe mak kontra no pro hodi halao reuniaun no deskusaun hamutuk hodi hetan solusaun. 

Koordenador ne’e justifika katak orsamentu 2013 bainhira aprezenta ba PN, Ministeriu Turizmu Preve hotu iha livru laran ba atividade ne’ebe maka atu halao iha tinan 2013. 

Atividade sira ne’e mak hanesan, Carnaval, Caravana Artistiku, Miss Timor, Kamelau Kultural, kurida kalavalo, kurida roo, marathona, Tour de Timor, inklui atividade seluk tan. 

Tuir koordenador ne’e informa, tempu besik Ministru kalbuadi sei konvoka inkontru ida hodi desidi atividade Miss Timor. Husi kriteriu prinsipal ne’ebe kandidatu sira tenki priense mak iha 3B (Bauty, Body and Behaviour), matenek, no mos iha hahalok diak, iha konesementu no vizaun diak, aprezentsaun diak, bonita, matenek, atetude diak, hatene lian ingles, portugues, tetun no Indonesia no iha talentu espesializada iha area balun. 

 Tuir ajenda ne’ebe mak publika antes ne’e katak, Miss Distrital sira sei hili iha loron 10 maiu no final Miss Timor Leste 2013 sei hala’o iha loron 22 Maiu 2013, maibe la konsege tamba hetan kritika barak, nune’e sei hadia ba fulan hirak mai.

.