“KAK Investiga Eis MS Nelson”

.

Jornal Independente - Kinta-Feira, 09 Maiu 2013 

Komisaun Anti Korupsaun (KAK) kuarta horseik halao tan prosesu investigasaun ba eis Ministru saude (MS), Nelson Martins kona ba kazu balun ne’ebe akontese iha Hospital Nasional Guido Valadares (HNGV) durante iha nia mandatu. 

Eis Ministru ne’e la esplika detailu tipu kazu ne’ebe nia rasik sai testamunha, nia ho diplomasia deit katak, kazu ne’e jornalista sira hatene ona. Nia marka prezensa iha instituisaun KAK uza kareta privadu ho numeru polisia, 25 071 iha horas tuku 3:00 no remata iha tuku 4 resin, investigador KAK husu perguntas kuaze hamutuk 20 resin. 

 Hafoin remata investigasaun, Nelson hateten, nia prezensa iha KAK atu kumpri karta notifikasaun ne’ebe KAK rasik mak hato’o ba nia hodi presta nia deklarasaun kona ba kazu balun ne’ebe akontese iha nia mandatu wainhira sei assume kargu Ministru saude iha tempu Governu Aliansa Maioria Parlamentar (AMP). 

“Nu’udar Ministru hau tenki mai fo testamunha kona ba kazu saida deit mak akontese, ohin hau mai sai tan testamunha kona ba kazu ida, hau hanoin kazu ne’e heboh ituan, jornalista sira hatene liu, hodi ajuda ita nia prosesu ne’e,” hateten nelson martins ba Jornalista iha edifsiiu KAK, KUarta (8/5). 

Nia hatutan, perguntas ne’ebe investigador KAK husu ba nia kuaze hamutuk 20 resin. Durante assume kna’ar Ministru saude iha tempu Governu AMP, nia sempre halo asinatura barak kona ba projeitu iha Ministeriu saude nian. 

“Hau lidera Ministeriu ne’e durante tinan 5, tinan lima ne’e desidi buat barak, importante mak ne’e, nudar ministru tenki brani hodi foti desizaun, ministru mak para halo desizaun fulan ida, fulan ida mos pasiente sira la hetan asistensia, tanba ne’e mak labele tauk halo desizaun, kuandu sala ida ne’e mak konsikoensia,” nia hateten. Nelson dehan, assume kargu publiku labele tauk hodi foti desizaun. 

,