“Inflasaun TL Atinji 10,9%”

.

Jornal Independente - Sesta-Feira, 17 Maiu 2013 

Inflasaun iha Timor Leste (TL) korentemente to’o porsentu 10,9%, numeru ne’e aas liu tarjetu Planu Dezenvolvimentu Estratejiku (PDE) 4% to’o 6% no mos aas liu nasaun barak iha Azia. 

Tuir relatoriu husi Yellow Road Workshop, inflasaun iha Timor Leste sa’e aas liu ona rate targeted iha PDE durante tinan rua resin nia laran. Inflasaun ne’ebe sa’e ne’e fo perigu hodi hamenus rendimentu ba konsumidor sira tanba folin ne’ebe aumenta makaas. 

Ne’e duni, ho kazua katak numeru kiak sei aumenta no ema barak sei difisil atu asesu ba presu sasan ne’ebe aumenta, relasiona ho numeru kiak iha Timor Leste sei aas. 

Iha parte seluk inflasaun aumenta ba kustu kompania Timor-oan sira hodi labele halo kompetisaun. Nune’e, salariu ba trabalador sira sa’e, maibe produtividade servisu ki’ik liu kompara ho nasaun dezenvolve daudaun (developing) sira iha Azia. 

Fator Esterna ne’ebe kontribui mosu inflasaun iha Timor Leste tamba presu produtu no depresiasaun moeda Dolar Amerika (USD), tanba moeda ne’ebe TL uza iha tinan 2010 no 2011 tuun liu ho moeda husi nasaun sira seluk. 

Nune’e, fator interna ne’ebe provoka inflasaun maka produtu lokal iha rai laran mos presu sa’e aas kompara ho produtu importasaun. Iha relatoriu ne’e mos esplika katak, kresimentu rekorente bele mos kontribui ba inflasaun, tanba governu hasai osan husi fundu petroliferu hodi aumenta osan ba projeitu sira ne’ebe durante ne’e hala’o iha Timor Leste.

.