“Governu Labele Interven Kazu Hera”

.

Jornal Timor Post - Kuarta-Feira, 15 Maiu 2013 

Prezidenti JMPTL (Grupu Mulheres Parlamentares Timor Leste), Josefa Pereira Soares husu Governu atu labele halo intervensaun politika ba prosesu julgamentu kazu Hera, tanba bele ameasa ba justisa judisiariu iha nasaun Timor-Leste. 

“Ida ne’e laos deit amesa ba demokrasia maibe ameasa ba sistema judisiariu, orgaun estadu ne’e ida-idak halao nia funsaun, ita lalika tau ita nia kanuro tohar iha laran,” dehan Prezidenti JMPTL ba Timor Post iha Parlamentu Nasional, Tersa (14/5), hafoin reuniaun plenaria. 

Prezidenti JMPTL hateten, nia la menta tebes ho pozisaun Governu nian ne’ebe hakarak halo intervensaun ba kazu Hera tanba, ne’e impede servisu ema seluk nia atu halo desizaun. 

“Hau hanoin ita Timor oan hotu tenki hakruk ba justica tuir lei haruka, karik kuandu haree katak iha sala, oknum ne’ebe komete krime ne’e tenki ba hataan iha Tribunal no nia tenki submete ba desizaun tribunal hodi kumpri pena ne’ebe tribunal hakotu, labele iha intervensaun husi Politiku se deit, ne’e sala ona, ita nia konstituisaun ho lei sira ne’ebe vigora iha Timor Leste la fo dalan,” lamenta deputada Josefa. 

Entertantu, iha parte seluk, Programa monitorizasaun Sistem Judisiariu (JSMP) iha esperansa maka’as katak, Presidenti Republika, Taur Matan Ruak sei la halo intervensaun ba julgamentu kazu Hera ne’ebe agora dadaun lao hela iha Tribunal. 

Diretur JSMP Luis de Oliveira sampaio hateten, se xefe estadu halo duni intervensaun mak sei hatur estadu de dereitu demokratiku nasaun TL iha ameasa ne’ebe grave. 

Mesmu kazu Hera akontese ho motivasaun politika maibe tanba prejudika ema nia vida entaun ema hotu tenki ba hatan iha tribunal tuir lei. 

“Ami hein katak, Prezidenti Republika labele halo asaun ruma hodi korta netik prosesu judisiariu ne’ebe lao hela, tanba ita nia imagina ida ne’e akontese maka ita sei hatuud estadu de dereitu demokratiku nasaun TL iha ameasa ne’ebe grave,” dehan nia ba Timor Post, foin lalais ne’e iha nia serviso fatin. 

-