Jornal Timor Post - Sabadu, 04 Maiu 2013
Provedor Direitus Umanus no Justisa (PDHJ) sebastiao Diaz Ximenes hateten, oras ne’e viatura estadu barak kontinua sirkula la tuir regra tanba laiha kontrolu husi superior sira iha kada instituisaun govenu.
“Loloos iha loron feriadu sabadu no Domingu, viatura Estadu tenki para hotu iha kantor, maibe realidade tinan 4 ona funsionariu sira sei lori viatura governu hodi tula ai-maran no tula familia,” informa Sebastiao ba jornalista sira iha Parlamentu nasional, foin lalais.
Tuir nia, problema ida ne’e akontese tanba falta kontrolu husi superior sira iha kada instituisaun Governu. Sebastiao hatutan, funsionariu publiku ne’ebe lori viatura estadu lao iha loron feriadu bele dehan laiha moral tanba kareta ne’e aset estadu hodi fo apoiu ba servisu estadu nian laos atu fo apoiu ba servisu privadu hodi tula familia pasiar.
Nudar funsionariu publiku, tuir nia, loloos tenki iha mentalidade katak, sai funsionariu publiku simu osan estadu tenke kuidadu sasan estadu no servisu tuir lei.
Lei la premiti funsionariu publiku uteliza fasilidade estadu iha loron feriadu, naunser ba halao servisu urjente ruma, maibe tenki iha autorizasaun husi nia superior.
.
Sem comentários:
Enviar um comentário
Nota: só um membro deste blogue pode publicar um comentário.