Estanislau da Silva: “FRETILIN Lamenta Folin Nesesidade Baziku Sa’e”

.

Jornal Nacional Diario - Tersa, 07 Maiu 2013 

Membru Parlamentu Nasional (PN) husi bancada FRETILIN lamenta folin nesesidade baziku no folin material konstrusaun ne’ebe oras ne’e dadaun sa’e ba beibeik iha loja sira no merkadu, tanba ne’e sujere ba governu atu hadia servisu alfandega no mos implementa ona sistema One Stop Shop atu fasilita. 

Deputadu Bancada FRETILIN, Estanislau Aleixo da Silva komenta, folin sasan to’o ohin loron kontinua sa’e maka’as no husu governu atu kria regulamentu ida para regula folin sasan. 

“Agora Governu maka tenki haree saida maka tenki halo para hodi regula presu, para la bele sai presu de inflasionariu, biar kompetisaun, biar merkadu livre, maibe iha produtu esensiais ne’ebe ke governu bele halo intervensaun para nune’e povu mukit bele iha asesu hodi hadia sira nia moris,” koalia Estanislau. 

Iha altura governasaun AMP hadia lei impostu ho intensaun normaliza folin sasan, maibe to’o ohin loron la konsege, ne’e tanba iha buat balun ke lao la diak. 

“Uluk kuandu ami deskute lei impostu ne’e iha Governu AMP, dehan katak hadia lei impostu ne’e para hatuun sasan nia folin i sira promete, sira la konsege halo e to’o agora mos sasan nia folin sa’e hela deit,” afirma deputadau FRETILIN ne’e. 

Eis Ministru Agrikultura iha primeira Governu konstitusional ne’e dehan maske lei tributaria implementa ona maibe seidauk bele fo benefisiu ba povu, maibe presiza hadia mos servisu alfandega nian. 

“Lei tributaria mesak deit sei la hatun, tenki hadia servisu de alfandega, tenki haree oin sa mak hatuun sasan husi ro laran lalais, purke lei tributaria bele tun maibe Ro para iha portu ne’eba kleur sei fo impaktu ba folin sasan mos iha, tanba ema ne’ebe mak importa sasan ne’e nia tenki selu impostu, entaun sasan ne’ebe importa ne’e biar folin baratu, maibe to’o iha ita nia rain sei sai karun, tanba ita portu servisu atrazadu, deskaregamentu atrazadu,” afirma Estanislau. 

Nia sublinha se Governu la tau ‘one Stop Shop’ nudar perioridade sei fo impaktu nafatin ba ema ne’ebe mak hakarak mai investe iha rai laran. 

 “Governu la hare situasaun One Stop Shop hanesan perioridade, e bainhira la hare nia hanesan perioridade, impaktu boot ba ema neebe hakarak mai investe ita nia rai laran, tamba sira mak investe rasik hakarak prosesu ne’e lao lalais para labele atraza ema nia pedidu, ba rejistu negosiu e autorizasaun ba investimentu ba ita nia rai laran,” haklaken deputadu bancada FRETILIN ne’e. 

.