“Estabelese Municipiu Kuidadu Ho KKN”

.

Jornal Nacional Diario - Sesta-Feira, 10 Maiu 2013 

Politika Governu Atu estabelese Municipio iha Distritu tuir observasaun Sosiedade Sivil planu refere ideal tebes, maibe husu atu atensaun ho didiak relasiona ho politika refere tanba bele hamosu no Haburas Korrupsaun Koluzaun ho Nepotismu (KKN). 

 Lia ne’e tatoli husi Direcotr exekutivu Organizasaun Naun Govermental (ONG) Luta Hamutuk Mericio Akara ba JNDiario iha nia servisu fatin, Farol, Kinta (09/5). Mericio Akara dehan, la dezentraliza ho didiak sei hamosu de’it KKN, tanba realidade hatudu durante tinan 10 resin ona Governu sentral deit la konsege kontrola ona nia liman ain sira hodi fo fatin ba KKN ne’ebe kontinua buras. 

Problema ida mos distribuisaun rekursu humanus, tanba la bele nega katak, intelektual ida Distritu menus tebes, ba sa maioria mak halo tiha ona nia aktividade iha sentral, tanba ne’e LH sujere governu presija halo modelu diak ida, para la bele divizionizmu fali ema hodi hamosu grupu ki’ik ba Distritu sira. 

“Ami konkorda poliku munisipiu, maibe kuidadu mak KKN mosu ita kontrolu la hetan, se wainhira preparasaun sistema rekursu humanus la diak, kuandu sistema la diak ema diak KKN bele akontese, se rua ne’e mak lao hanesan ita sei la kria KKN, maibe ita desentraliza dezenvolvimentu no loke Kampo de Trabalho,” dehan Direktur Ezekutivu Luta Hamutuk Mericio Akara. Mericio Akara mos gava katak, planu governu harii munisipiu ne’e plani ideal, fasilita komunidade iha Distritu bele partisipa direta iha prosesu dezenvolvimentu iha sira nia Distritu, tanba durante ne’e Governu sentral deit mak kaer entaun Distritu sira dok husi prosesu dezenvolvimentu, nune’e povu la partisipativu, tanba ne’e ho munisipiu hatudu momos vontade ida atu hamosu dezenvolvimentu husi komunidade ba nasional. 

Impaktu pozitivu seluk husi Municipiu bainhira buat hotu mak desentralizadu ema sei la hobur mai Dili, rekursu humanus ne’ebe iha nivel Distritu no Sub-Distritu ne’e sei konsentra iha ne’eba no buat barak mak sei akontese hanesan sentru produsaun, sentru industria, bisnis, saude, edukasaun no kultura. 

Maibe hanesan sosieade sivil kontinua duvida tanba durante iha sosializasaun governu seidauk esplika klaru atu desentraliza politika ekonomia ka desentraliza deit kna’ar administrative, se halo deit kna’ar administrative entaun hanesan deit. “Ita hakarak ne’e tau poder, ekonomia no administrative, se administrative deit entaun sei susar oituan tanba agora ita hare atu trata deit Distritu labele tiha ona sa tan munisipiu,” afirma Mericio Akara. 

Iha parte seluk, Inacio Pereira da Silva Dicente Ekonomia iha Dili Institute of Technology (DIT) fo ninia hanoin katak, planu implementasaun Munisipiu ne’e furak tanba bele dezenvolvimentu hodi hakbesik ba povu iha area rural, tanba durante tinan 10 nia laran povu la senti dezenvolvimentu, bas a dezenvolvimentu ne’e rasik konsentra iha kapital deit. 

Tanba ne’e, wainhira estabelese munisipiu tenki kria sistema ida nebe forte, se lae hamosu korupsaun e dezenvolvimentu la lao, hodi hariku deit ema balun hanesan akontese agora iha Dili. 

,