Dr. Mari Alkatiri: “Banku Foun Maka Garante Fundus Master Plan”

.

Jornal Timor Post - Sabadu, 11 Maiu 2013 

Molok atu implementa Master Plan iha Oe-cusse no fatin sira seluk, sei kria uluk instituisaun Banku ida para bele garante fundus master plan ne’e tuir jestaun ne’ebe diak. 

 “Modelu infraestrutura ne’ebe maka ita harii dadaun iha Timor-Leste ne’e foun iha mundu, tanba ne’e ita sei kria Banku foun ida para bele halo jestaun diak ba projetu ne’e,” Eis Primeiru Ministru Dr. Mari Alkatiri hateten ba Jornalista sira, Kinta (09/5) iha ninia rezidensia Farol, Dili. Nia hatutan, Jestaun Finanseiru ne’e mak kriasaun Banku ida para halo jestaun ba jestor investimentu hotu ne’ebe atu haree ba Projeitu Master Plan. 

Tuir nia, kriasaun Banku ne’e la involve Ministeriu sira, Banku ne’e independen, tanba fundu sira barak liu mai husi osan privadu. “Estadu nia osan iha de’it um tersu no dois tersu mai husi privadu, Alkatiri esplika. Kriasaun Banku ne’e atu halo jestaun para bele fo rendimentu ba parte 3, hanesan Ekonomiku, Sosial no Finanseiru ne’ebe atu jere funan ne’ebe atu tama fali. 

 “Ne’e mak hau dehan inovador tanba modelu ne’e foun, Normalmente ita laos hein de’it funan husi osan sira ne’e, maibe Banku maka sei halo jestaun tuir dalan banku nian para atu harii sidade ida foun liu husi infraestrutura ne’ebe modernu,” Mari dehan. Eis xefe Governu ne’e konfesa liu tan katak, kriasaun banku ne’e privadu maibe sei liu husi lei ida, naturalmente tenke liu husi governu no mos ninia dekretu lei ne’e mai husi Parlamentu. 

Tuir Sekretariu Jeral partidu FRETILIN ne’e katak, maske oras ne’e seidauk iha banku foun ida para atu jere fundus master Plan ne’e, maibe nia informa katak, osan governu nian seidauk hasai sentavos ida. 

 “Hau nia viazen ba mai ne’e maka konsereza hasai ona osan husi estadu nian, maibe servisu tekniku ne’ebe mak ita halo kona ba arkitektur mai husi enjinerista, ekonomista no sira seluk tan seidauk gasta buat ida,” Mari esplika. 

 Nia mos akresenta liu tan katak, projeitu modernu husi Master Plan ne’e para atu atrai investor sira husi rai liur atu ultrapasa nia vida iha fatin sira hanesan ne’e. 

“Hanesan turismu, saude, edukasaun no buat sira seluk, prjeitu ne’e ita halo ho kualidade nivel internasional duke ita nia moras sira tenki lori ba tratamentu iha Singapura maibe ita lori de’it ona ba Dili-Oecuse,” Mari Tenik. 

Nia esplika mos katak, hanesan mos Edukasaun, Estudante sira la presiza ba tan rai liur, maibe sira ba hasai deit ona mazestradu no dotoramentu iha Oe-Cusse, tanba ne’e mak area edukasuan ne’e sei halo ho nivel internasional.

.