“Deputadu Kestiaona Sistema Kobertura TVTL”

.

Jornal Independente - Tersa-Feira, 14 Maiu 2013 

Deputada sira iha Parlamentu Nasional (PN) kestiaona sistema kobertura Televizaun Timor-Leste (TVTL) tanba la halo kobertura ba atividade fiskalizasaun membru PN iha Distritu. 

Deputadu bancada FRETILIN Inacio Moreira hateten, membru PN sira ba iha Distritu hodi halo fiskalizasaun ba atividade governu nian maibe laiha jornalista TVTL nian mak akompania sira hodi halo kobertura maske sira hato’o ona karta konvite ba redasaun TVTL. 

“Ami ba Oecusse mos fo hatene sira (TVTL), sira dehan la iha tempu, ba fali suai, ami ba iha Fatumea, fatu-Lulik, Maukatar ami lao hotu mais laiha akompaniamentu ida, ami sente hanesan sei iha fakta ida tanba informasoens ne’ebe presiza fo sai para ita nia povu ne’e bele hatene,” hateten Inacio liu husi sesaun Plenaria PN (13/5). 

Maibe nia hatutan, kuandu membru Governu sira, hanesan SEPFOPE mak halao aktividade to’o iha Bali-Indonesia mos TVTL ba halo kobertura. 

Lamentasaun hanesan mos hato’o husi Deputadu bancada Partidu Demokratiku (PD) Paulino Monteiro katak, TVTL labele ba haree deit ka halo kobertura deit ba atividade loke sampaina. 

Nia dehan, se xefe departementu ida husi governu nian ba Indonesia TVTL ba halo kobertura, tanba sa mak komisaun sira ba halo fiskalizasaun TVTL la ba. 

“Hau husu tan dala ida, se bele karik toma atensaun ba ida ne’e,” hateten Monteiro.

.