“CPD-RDTL Kontra Miss Timor”

,

Jornal Timor Post - Sesta-Feira, 10 Maiu 2013 

Grupu Konsellu Popular Defeza- Republika Demokratika Timor-Leste (CPD-RDTL) afirma, pozisaun hodi la apoiu 100% ba eventu Miss Timor, tanba kondisaun Timor ohin loron presiza liu mak oinsa povu bele han loron ida dala tolu ho nutrisaun ne’ebe diak, hela iha mahon diak ida nia okos, fasilidade infraestrutura baziku ne’ebe diak. 

 “Buat hotu-hotu ne’ebe mak konsagra iha Ministeriu sira nia planu no asaun ne’e diak, maibe baa mi CPD-RDTL rejeita total programa Miss Timor Leste ne’e, tanba seidauk oportunutu ba ita, agora ba ita mak oinsa konsolida ita nia instituisaun estadu, hadia povu nia moris no kria kondisaun infraestrutura baziku ba Povu,” dehan koordenador CPD-RDTL Antonio Aitahan Matak iha Dili, Kinta (9/5). 

Matak dehan tan,”ita mos labele tur iha tronu para hola deiszaun hodi obriga ema tenke submete, maibe tenki iha moral atu halo sosializasaun no fo konesementu ba Povu kona ba kontiudu Miss Timor atu povu bele esklaresidu,” Matak dehan. 

Matak dehan tan, CPD-RDTL konkorda 100% bainhira governu halo ona ivenstimentu ba seitor edukasaun, saude, halo uma ba povu, dada eletrisidade ba povu, halo estrada diak ba povu, no bele kria kondisaun diak ba povu atu povu bele han dala tolu loron ida, atu nune’e, Miss Timor ne’e implementa karik povu bele kabun bosu ona. 

Nia mos hatutan, kona ba deklarasaun Primeiru Ministru Xanana Gusmao no Primeira dama Isabel Ferreira neebe apoiu eventu Miss Timor, matak argumenta, PM ho Ptimeira Dama hare liu ba vizaun global mundu nia lalaok, maibe presiza mos hateke ba kotuk no tenki hatene tau an, liu-liu povu nia moris oras ne’e dadaun. 

 “PM xanana ho primeira Dama ‘memang hebat’ tanba sira nain rua iha konesementu ho vizaun ne’e global tebes, maibe ita presiza hateke mos iha ita nia sorin-sorin no kotuk, katak, ita ne’e iha ne’ebe?, ita mai husi nebe? 

No ita atu hakat ba nebe?,” Matak tenik tan. Matak mos afirma katak, grupu intelektual, autoridade balun husi igreija, feto parlamentar no organizasaun feto sira foti kestaun maka’as hodi kontra, maibe Ministeriu kontinua mantein hodi realiza programa ne’e. 

Antes ne’e, Ministru Francisco Kalbuadi Lay akresenta, tuir orariu 24 Maiu ne’e, bele ona estabelese eventu Miss Timor, maibe, Kalbuadi promete sei halo konstrusaun klean ho entidade hotu ne’ebe kontra eventu ne’e hodi rona sira nia hanoin no opsaun. 

,