“Claudio Seidauk Keixa Aniceto Ba MP”

.

Jornal Nacional Diario - Tersa-Feira, 14 Maiu 2013 

Prezidenti Tribunal de Rekursu (TR), Claudio Ximenes deklara katak, to’o agora nia seidauk hatama keixa ruma ba Ministeriu Publico (MP) konaba akuzasaun deputadu Bancada FRETILIN, Aniceto Guterres, foin lalais ne’e iha Parlamentu Nasional. 

Deputadu Aniceto Guterres akuza Prezidenti TR, Claudio Ximenes foin lalais ne’e bazeia ba numeru kontaktu ne’ebe maka Deputadu Aniceto hasai husi numeru telephone Timor telekom (TT) nian kona ba kazu prijioneira eis Ministra Justica Lucia Lobatu nian ne’ebe dehan Prezidenti Tribunal de Rekursu mos involve hotu iha kazu ne’e, ne’ebe antes ne’e dehan, Prezidenti TR kontaktu hela deit ho Prijioneira Lucia Lobatu konaba kazu ne’ebe mak Prijioneira ne’e hasoru. 

“Hau la haruka akuzasaun ida ka la haruka keixa ida ba Ministeriu Publico hasoru Dr. Aniceto Guterres ka hasoru ema naran ida,” deklara Prezidenti Tribunal de Rekursu, Claudio Ximenes ba Jornalista sira iha Palasiu Prezidensial Aitarak Laran, Dili, segunda (13/5), hafoin hasoru malu ho Prezidenti da Republika Taur Matan Ruak. 

Relasiona ho kazu ne’e Prezidenti TR dehan katak, nia pronto ba hatan iha MP, wainhira MP iha rajaun ruma kona ba kazu ne’e, maibe Prezidenti TR hatutan tan katak, nia laiha problema ruma atu fo deklarasaun iha MP. 

 “Iha situasaun ne’ebe Ministeriu Publiku iha razaun atu bolu hau hodi fo deklarasaun, hau la iha problema ida atu fo deklarasaun mas ne’e iha situasuan hotu-hotu,” dehan Claudio Ximenes. 

Antes ne’e, deputadu Aniceto Guterres presta ona deklarasaun iha Ministeriu Publiku (MP) hasoru relasiona ho kazu ne’e. Aliende ne’e, relasiona ho kazu Prijioneira Lucia Lobato nian kona ba Habeas Corpus ne’ebe mak advogado eis Ministra Justica nian ne’ebe entrega ona ba Tribunal, Prezidenti TR dehan nia rasik lahatene kona ba kazu ne’e tanba nia sai tiha ba rai liur, entaun kazu ne’e iha Juiz seluk maka toma konta ba Habeas Corpus ne’e. 

.