Bendito Freitas: “Adidu Laiha Direitu Hasai Bolseirus”

.

Jornal Timor Post - Sabadu-Feira, 11 Maiu 2013

Ministru Edukasaun (ME) Bendito Freitas hateten, nia parte seidauk simu informasaun adidu edukasaun iha Filipina Manuel do Carmo disidi hapara estudante bolseiru Timor-oan na’in 10.

“Hau seidauk hetan informasaun klaru kona ba ida ne’e, loloos adidu tenki pasa informasaun mai iha Ministeriu Edukasaun no amu buka atu hatene liu husi ita nia embaixada iha Filipina atu bele verifika faktus sira ne’e, ami buka atu hatene informasaun sira ne’e, hau pesoalmente seidauk simu,” Ministru Bendito Freitas ba Jornalista sira iha kapital Dili. Nia esplika, loloos adidu ne’ebe Ministeriu Edukasaun haruka ba atu foti desizaun hodi hasai estudante bolseiru, maibe halo konfirmasaun ho Ministeriu mak bele disidi.

 “Loloos adidu labele ho desizaun katak atu hasai alunu ida, desizaun ne’e tenki mai husi Ministeriu, agora adidu hasai tanba razaun saida, tenki konsulta ba Ministeriu, tanba buat hotu Ministeriu mak hatene, adidu so bele haree deit progresu estudante nia la’o diak ka la diak, iha problema no difikuldade ruma releta mai Ministeriu atu bele halo asaun politika, adidu ne’e fasilita prosesu ne’e iha ne’ebe,” Bendito esklarese.

Nia dehan, dadauk ne’e adidu husi edukasaun ninian mak iha Indonezia, Portugal no Filipina ne’ebe mandatu sei remata iha 2013 ne’e nia laran.

“Ita nia adidu sira ne’e iha loron 30 Junu sira nia mandatu hotu, ami sei buka fali atu bele haree, tanba ita labele husik ema ida permanente to’o tinan lima ka neen, tenki fo tempu ba ema seluk atu bele hadia sistema iha ne’eba atu bele halo atendementu diak liu,” Informa Bendito.

Ministru Bendito dehan tan katak, fulan-Junu 2013 ne’e, Ministru rasik sei la’o ho Primeiru Ministru ba Filipina hodi haree kestaun sira ne’ebe akontese.

Antes ne’e, deputadu Bancada FRETILIN Osorio Florindo informa, adidu edukasaun iha Filipina ho Naran Manuel do carmo konsege hasai ona estudante bolseiru hamutuk nain 10 hodi labele kontinua hetan fasilidade husi estada ba iha sira nia estudu.

.