Asosiasaun Jornalista Deklara Mantein Prinsipiu Jornalista “Jornalista Nain 8 Hetan Violasaun”

.

Jornal Nacional Diario - Segunda-Feira, 06 Maiu 2013 

Asosiasaun Jornalista Timor Leste (AJTL) no Timor Leste Press Club (TLPC) deklara katak, Jornalista sira iha Timor Leste nafatin mantein prinsipiu Jornalismu maske partidus politikus (PARPOL), Governante no opozisaun halo ona konjuntura politika iha Parlamentu Nasional (PN) hodi sai fali defeza ba politiku nain no Governante sira. 

 Liu husi delarasaun ne’ebe maka AJTL no TLPC halo iha Sub Distritu Balibo, Distritu Bobonaro iha loron Kinta (02/05) katak, Jornalista sei nafatin ho prinsipiu atu hala’o papel nudar edukador, divertidor, formador no kontrolu social ne’ebe diak. Prezidenti AJTL, Tito Filipe, hamutuk ho prezidenti TLPC, Jose da Costa Belo, deklara katak, Timor Leste nuudar nasaun ida direitu demokratiku hahu haburas nia demokrasia desde nasuan ne’e hetan nia independensia. 

Partido politiku no povu tomak ne’ebe sai instrumentu ba demokrasia iha konsensia no matoridade politika ida ne’ebe a’as mak rezultadu eleisaun iha tinan kotuk komprova ba Timor oan tomak katak, estadu Timor Leste ho nia ema sira iha kumprimisiu boot atu tane aas espiritu demokrasia no dezenvolvimentu politika. 

“Media ho kontekstu ne’e sei la foti pozisaun politika hodi haliis ba politika Grupo Politiku ida, maibe sei nafatin ho prinsipiu Jornalismu atu hala’o loloos papel nudar edukador, divertidor, formador no kontrolu social ne’ebe diak, konjuntura politika ne’ebe oras ne’e ejiste sai tiha fali defeza ida ba politiku nain sira no Governu dala barak Media no jornalista maka sai kulpa wainhira hala’o nia kna’ar,” deklara Prezidenti AJTL, Tito Filipe. 

Aliende, deklara prinsipio Jornalista nian ba konjuntura politika entre PARPOL ne’ebe ukun no opozisaun, Assosiasaun rua ne’e mos fo dadus jornalista sira ne’ebe maka hetan violasaun durante tinan 2012 to’o agora. 

Tuir dadus ne’ebe mak assosiasaun ne’e rejistu katak, durante ne’e jornalista nain 8 maka hetan violasaun ho tipu oi-oin maibe violasaun grave liu maka jornalista ida hetan sona no nain rua hetan pena indeminizasaun Civil tanba sira nia publikasaun iha media,” akresenta Prezidenti AJTL, Tito Filipe. 

Nia hatutan tan katak, husi akontesementu ne’e sai obstaklu ba Media TL, tanba ne’e AJTL no TLPC ne’ebe ho nia misaun atu halo advokasia no kampania ba liberdade imprensa iha Timor Leste, ne’ebe deklara katak, Timor Leste nu’udar Estadu Direitu demokratiku tenki tane as prinsipiu demokrasia liu husi meus promosaun ba liberdade imprensa. 

Tanba ne’e, asosiasaun sira husu estadu no povu tomak tenki foti lina frente atu proteje jornalista no promove liberdade imprensa iha TL, tuir konstituisaun artigu 40 no 41 haruka. 

.