ASESU BEE-MOS DALAN SEI NARUK!!!

.

Iha ita nia Palacio Governo, bee barak, sai piscina furak iha 24 horas nia laran. Nunka maran!!!

KOMUNIKADU DA IMPRENSSA: ASESU BEE-MOS DALAN SEI NARUK!!! 

Povo Dili Falta Bee-mos: Luta Hamutuk Ejiji ba Governu Atu Aplika Karakter Emerjensia ba Projeto Bee-mos iha Dili laran...!!! 

Konstituisaun RDTL rekonyese katak bee-mos núdar rekursu naturais estado nian hodi utiliza ba interese nasional tanba iha valor sosial,no tenki uza ho efisiente ba ema hotu. Tanba-ne’e, estabelese decrito lei no.4/ 2004 konaba fornesemento bee-mos ba konsumu publiku nian, hodi halo jestaun ba bee-mos ho diak hodi nune’e povu hotu núdar konsumidores bele uza bee-mos hodiak e sufisiente. Bee-mos hanesan nesesidade mais baziku ba povu nia moris lor-loron, laiha bee-mos sei laiha moris, ho bee-mos povu bele hadia diak liutan sira-nia saniamentu, laiha bee-mos saniamentu mos sei ladiak, bee-mos bele redus moras oioin, bee-mos núdar indikadoriu ba kiak nian no bee-mos iha funsaun sosial selseluk tan. 

Iha ona peskiza barak ne’ebe mak aprezenta situasaun real povu nian konaba asesu ba bee-mos nomos kondisaun saniamentu iha areia urbana. Inkluindu iha Distrito Dili ne’ebe hatudu katak, bee-mos tuir lolos sufisiente hela maibe realidade hatudu maioria povu sei falta asesu bee-mos, volume bee ki’ik tebes no bee-mos seidauk to’o iha povu ida-idak nia uma. Nune’e Povu sei la’o do’ok hodi asesu ba bee-mos no dala barak hadau malu bee-mos tanba bee la to’o ba sira. Ezemplu lubun, ita bele hare’e iha Becora, Taibesi, Lahane, Kakaulidun, Farol, Manleuana no Comoro sei hasoru problema bee-mos; sira sempre ejiji ba Governo tanba sei hasoru falta bee-mos. 

Bazeia ba dadus husi Governu katak, asesu komunidade ba bee-mos iha Distrito Dili atinzi ona entre 80-100% (Fontes: Livru OGE 2013 No. 3, pajina 9). Dadus ne’e hatudu katak, asesu bee-mos iha Distrito Dili diak liu kompara ho distrito sira seluk. Ami hare’e katak, dadus ne’e sei kontradiks ho realidade ne’ebe Luta Hamutuk deskobre, tanba komunidade iha Dili sei infrenta problema falta bee-mos. Povu sei konsumu bee-mota iha tinan barak nia laran ba nesesidade lor-loron nian, nune’e mos lori jerigen mamuk tun-sae buka bee-mos no halo kuak kanu iha fatin publiku sira hodi bele asesu ba bee-mos. Dala ida tan, realidade sira ne’e la refleta ho dadus ne’ebe Governu aprezenta ona. 

Nivel politika orsamental, iha 2011, governu muda ona jestaun infrastruktura ba iha Ajensia Dezenvolvimento Nasional (ADN) liu husi fundo infastruktura nian, hodi finansia bee-mos atu atinzi MDG 2015 ho alokasaun orsamento hamutuk $20,420 miloens de dolar. Nune’e mos iha 2012, aloka tan $40,420 miloens (inklui alokasaun husi osan imprestimu nian). Hanesan mos iha Strategic Development Plan 2011-2030 katak, bee-mos sai prioridade nune’e preodikamente sei aloka osan kada tinan to’o atinzi $94.2 milioens hodi kompleta bee-mos iha areia urbana sira. 

Iha tinan 2013, Distritu Dili kontinua hetan alokasaun orsamentu hamutuk $11,936 milhoes maibe orsamentu ne’ebe mak aloka tiha ona ne’e seidauk bele rezolve kestaun bee-mos iha Dili laran tomak. 

Hare’e ba importansia bee-mos ba povu Distrito Dili nia moris lor-loron nian, ami hanoin katak falta bee-mos ba povu tenki konsidera núdar situasaun ida mak grave no tenki konsidera ona hanesan situasaun emerjensia. Tanba emerjensia, presiza mos hetan atuasaun extraordinariu atu rezolve imediata no lalais husi estado, liu-liu Governu. 

 Ho realidade no razaun hirak iha leten, ami hakarak rekomenda ba:

1. Primeiru Ministro, no ami ejiji maka’as ba Governu liu husi Primeiru Ministro atu aplika lalais karakter emerjensia ba projeto bee-mos iha Dili laran tomak. Ho karakter emerjensia ne’e, ami husu atu iha fulan tolu nia laran, minimu Governu tenki rezolve ona problema bee-mos iha Dili laran. 

2. Parlamento Nasional, atu fo apoiu no husu ba Governu hodi implementa projeto bee-mos ho karakter emerjensia, tanba laiha bee-mos sei fo implikasaun negativu ba povu nia moris lor-loron, liu-liu sei afeita ba iha saude publiku nian. Husu mos atu kontrolla no fiskaliza ho rigorozu, hodi nune’e projeto refere iha kualidade no fo benefisiu duni ba povu tomak. 

3. Presidente da Republika, atu husu urjentimente no fo apoiu ba Governu hodi implementa projeto bee-mos ho karakter emerjensia. Ho apoiu Presidente nian, reflete mos promesa ne’ebe mak Presidente rasik hateten bainhira halo kampanye iha eleisaun jeral nian katak, “sei halo buat hotu hodi hasai povu husi kiak no mukit.” Mak ne’e deit, ba ita hotu nia atensaun, ami hato’o obrigado wain. 

Dili, 03 de Maio de 2013 

Mericio Akara Executive 

Director Luta Hamutuk 

Tel: (+670) 77263783

REPORTAGEM FOTOGRÁFICA DE JOÃOZITO VIANA - LUTA HAMUTUK

Becora

 .

Taibessi

Kakulidum

Taibessi

Becora

Jardim 5 de Maio

Farol

Tasitolu

Tanba laiha be'e mos, labarik sira mos tenki dudu karosa hodi buka be'e mos.

.