“Alkatiri Breafing CNT Konaba Master Plan”

.

Jornal Nacional Diario - Kuarta-Feira, 15 Maiu 2013 

Koordenador Programa dezenvolvimentu (Master Plan) rejiaun Oecusse, Mari Alkatiri, tersa (14/5), iha nia rezidensia, Farol, Dili, simu grupu emprezarial Consorsio Nasional Timorense (CNT) hodi fo breafing konaba programa integradu Master Plan ne’e rasik. 

Iha hasoru malu oras ida ho balun nia laran, hahu husi tuku 11.00 to’o tuku 12.30, eis Primeiru Ministru (PM) Mari Alkatiri, haksolok tebes simu prezensa grupu CNT nian ne’ebe kompostu husi Prezidenti Jorge Serano, Nilton Gusmao, Primeiru Vise Prezidenti, Agustinho Gomes, Segundu Vise Prezidenti, Cipriano januario Goncalves da Costa nu’udar CEO, Ahmad Alkatiri, Americo Ferrozota, Ijen Filipe, ho Lay Fu Seng. 

Enkontru ne’e, ami CNT aproveita hodi komprementa eis titular Dr. Mari Alkatiri, ne’ebe assume mos kargu importante nuudar koordenador dezenvolvimentu rejiaun Oecusse nian,” informa Prezidenti CNT, Jorge Serano ba Jornalista hafoin hasoru malu ho Mari Alkatiri. CNT nuudar organizasaun emprezarial Timor oan nian ida, hetan mos konvite husi eis PM Mari Alkatiri, atu partisipa iha konsluta publiku kona ba projeitu Master Plan iha Oecusse ne’ebe termina ona atu realiza iha kinta (23/5), semana oin. 

“Ho konvite ne’e, ami nain 7 iha CNT hola inisiativa mai Vizita formal Dr. Mari Alkatiri, hodi koalia mos hanoin ruma kona ba planu dezenvolvimentu rejiaun Oecusse,” hateten Jorge Serrano.

 Kona ba kontribuisaun saida mak CNT atu fo iha programa Master Plan ne’e, Jorge Serrano, esklarese katak, prosesu ida ne’e foin mak iha hela planu nia laran, maibe CNT hanesan empreza Timor oan nian ida pronto atu kontribui no partisipa ativa iha prosesu dezenvolvimentu nasional. 

Iha hasoru malu ne’ebe nakonu ho sentidu maun-alin Timor oan de’it, Mari Alkatiri responde pozitivu tebes, hodi fo hanoin ba malu kona ba servisu saida mak tenke halo iha futuru atu CNT bele partisipa ativu, liu-liu iha area dezenvolvimentu infra-estrutura ne’ebe atu estabelese iha dezenvolvimentu rejiaun Oecusse nian. 

Iha fatin hanesan, eis Primeiru Ministru Mari Alkatiri, informa katak, iha sorumutu ne’e nia esplika no breafing membru CNT sira nuudar parseiru importante iha dezenvolvimentu ne’ebe atu mosu iha Oecusse. 

Alkatiri esplika katak, programa dezenvolvimentu Oecusse ne’e la’os Atoni oan sira deit mak sei hetan benefisiu, maibe sei alastra to’o distritu sira seuk ne’ebe tama mos iha projeitu pilotu planu dezenvolvimentu ida ne’e. 

Tuir Alkatiri, programa dezenvolvimentu rijiaun Oecusse nian sei kria kondisaun, loke kampo serviso ba komunidade, liu-liu jobventude sira iha area ekonomia social no selu-seluk tan. 

“Kuandu to’o ona faze implementasaun mak seitor privadu nasionais sei partisipa hotu, inklui CNT,” afirma Mari Alkatiri. 

.