Vicente Guterres: “Difisil Haree Lei Anti Korupsaun”

.

Jornal Nacional Diario - Kinta-Feira, 18 Abril 2013 

Preokupasaun ba lei Anti Korupsaun atu hetan aprovasaun lalais ne’e, aleinde mai husi Ministeriu Publiku (MP) ne’ebe sai autor, iha mos preokupasaun husi Komisaun Anti Korupsaun (KAK), Prezidenti Republika (PR) no mos sosiedade sivil balun tanba konsidera lei Anti Korupsaun ne’e importante atu iha hodi bele fo kbi’it ba KAK no MP atu aselera prosesu investigasain ba kazu korupsaun sira ne’ebe deskonfia akontese iha instituisaun estadu nian balun. 

 Maibe Prezidenti parlamentu Nasional (PN) Vicente da Silva Guterres, hateten katak, iha tinan ne’e difisil PN atu haree lalais lei ne’e, tanba sei iha perioridade seluk ne’ebe mak PN tenki hala’o uluk. 

Tanba ne’e, Vicente Guterres hateten katak, iha tinan seluk mak PN bele iha disponiblidade atu haree ba projeitu lei Anti Korupsaun ne’ebe mak MP haruka ona iha tinan 2010, ba PN atu deskute no aprova. 

“Konserteza, mas tinan ida ne’e kala difisil tamba buat barak mas, se tinan sleuk bele haree ida nee,” Visente Guterres informa ba Jornalista sira, wainhira hala’o sorumutu ho Prezidenti da Republika Taur Matan Ruak iha Palacio Prezidensial, Aitarak laran, Dili, Kuarta (17/4), relasiona ho preokupasaun husi Prokurador Jeral Republika (PJR) sesante no Xefe estadu ne’ebe husu Parlamentu nasional atu aselera diskusaun ba projeitu lei Anti Korupsaun atu bele fo kbiit ba KAK no MP atu hala’o investigasaun kazu korupsaun, iha pazi ida ne’e. 

 Vicente Guterres haktuir katak, durante iha sorumutu ho Xefe Estadu ne’e, sira nia parte mos lakohi konaba projeitu lei anti korupsaun. Nia akresenta katak, Projeitu lei Anti Korupsaun ne’e, la’os foun maibe projeitu lei uluk nian ne’ebe maka iha terseira lejislatura ne’e bele hatama fila fali. 

 “Nu’udar Prezidenti Parlamentu, hau hateten katak, iha projeitu uluk nian i konserteza ke to’o fim de mandatu uluk remata tiha ona mas bele hatama fila fali, mas ida ne’e ami la koalia,” dehan Vicente Guterres.

.