“Tribunal Prende Raul Lemos Nia Hummer”

.

Raul Lemos

Jornal Nacional Diario - Kuarta-Feira, 03 Abril 2013 

Tribunal Distrital Dili (TDD), segunda (1/4), prende (sita) ona kareta JEEP Hummer ne’ebe Raul Lemos fa’an tiha ona ba Timor oan iha hela iha bairo santa Cruz, Dili. 

Kareta Hummer ho numero Polisia 88.88 TL ne’e, Tribunal Prende tamba hetan akuasaun husi Ministeriu Publiku (MP) ne’ebe simu keixa husi raul Lemos nia devorciada (mantan isteri), Silvalay Noor Athalia alias Atha. 

Atha kaixa Raul lemos ba Ministeriu Publiku, tanba konsidera Raul Lemos la fo alimentos ba nia oan nain rua, Faris ho dilla, durante tinan ida ona, no Atha husu ba MP atu prende tiha kareta ne’e. 

Hafoin devorsiu tiha Atha, Raul Lemos kaben fali ho Diva Pop Indonesia, Krisdayanati (KD), ne’ebe halulik tuir tradisaun musulumanu nian iha loron 20 fulan Marsu tinan 2011 iha Jakarta. “Tuir desizaun husi Tribunal katak, fulan-fulan Raul Lemos tenki fo alimentos ba nia oan nain rua (Faris&Dilla) ho montante U$2.000, maibe tanba nia la kumpri ona mak Atha ba keixa iha MP atu prende kareta ne’e, nune’e fa’an tiha hodi bele sustenta fali nia ona,” informa ofisial justica ba jornalista sira iha Tribunal Distrital Dili, Tersa (2/4). 

Kona ba kareta ne’e, Raul Lemos fa’an ona ba ema balun iha Bairo Santa crus, maibe Tribunal tenke prende nafatin kareta ne’e tanba kazu ne’e iha relasaun divorsio entre Raul Lemos ho Atha. 

Nune’e, kareta Jeep Hummer ho kor mutin ne’e para ona iha Tribunal Distrital Dili (TDD) hodi hein fali prosesu julgamentu foun ba problema ne’e no bele hetan desizaun ida adekuadu ba problema ne’e. 

Bainhira jornalista koko atu konfirma ema ne’ebe sosa kareta ne’e husi Raul lemos, maibe nia lakohi fo komentariu, ho rajaun katak, ne’e problema privadu entre Raul Lemos ho Atha. 

To’o notisia ne’e hatu’un seidauk iha konfirmasaun ba Raul Lemos, tanba nia sei iha hela Indonesia. 

.