Seidauk Tempu Hala'o Miss TL

.

Diariu Timor Post - Selasa, 23 April 2013 

Dili—Situasaun riil povu iha Timor-Leste (TL) oras ne’e dadaun seidauk nesesariu atu Ministeriu Turizmu (MT) kria eventu  Miss, tanba povu sei moris ki’ak no halerik ba estrada, bee mos no seluk tan.

 

“Eventu Miss akontese iha nasaun ne’ebé dezenvolvidu ona, mais Timor-Leste seidauk tempu atu kria eventu, tanba povu sei moris ki’ak. Tan ne’e, ami konsidera eventu Miss TL ne’e seidauk nesesáriu,” Deputy Organizasaun Naun Govermentais Luta Hamutuk Joãozito Viana ba Timor-Post iha nia kna’ar fatin, Segunda (22/4).

Joãozito hatete, area turimu iha distritu no nasionál barak sei abandona. Nia kestiona, tansa mak MT la koloka osan hodi dezenvolve area hirak ne’e duke eventu Miss TL ne’ebé sei gasta boot maibé laiha rezultadu.

Eventu Miss ne’e, tuir Joãozito, povu li-liu alin feto sira iha area rurais sei halerik buat barak. “Eventu Miss ne’e hatudu vida moris ne’ebé karun, agora ita nia povu sei konsumi bee mota, Ministériu Turizmu mehi de’it buat di’ak, maibé kria eventu Miss ne’e la haree ba situasaun rill ne’ebé agora akontese iha ita nia rai laran,” Joãozito lamenta.

Nia komenta tan, eventu Miss ne’e la’os fatór atu dada investór, tanba ne’e nia rekomeda atu oinsá MT ba netik distritu hodi identifika fatin ne’ebé potensia ba turizmu, no pauzada ne’ebé abandona, nune’e bele atrai turista sira.

Entertantu, MT hahú loke ona inskrisaun hodi fó oportunidade ba feto foin sa’e sira  ne’ebé matenek (intelijensia) no bonita ho furak atu kompete.

Kordenador programa ba eventu ne’e mak Aderito Babo. Antes ne’e, liu husi konferensia da imprensa, Babo dehan, eventu ne’e prepara foin sa’e Timor oan sira husi nivel nasionál to’o distritál hodi konkore ba eventu miss internasionál hanesan Miss Asia, Miss Universe no Miss Earth nune’e bele hamorin TL nia naran iha mundu.

“Ne’e primeiru eventu ne’ebé Ministériu turizmu hala’o hodi haree ita nia feton Timor oan sira ne’ebé iha koñesementu di’ak bele tuir eventu ne’e,” Babo ba jornalista sira iha edifisiu MT, Farol-Díli, Tersa (16/4).

Livru 2 OJE La Temi

Atividade saida de’it ne’ebé governu atu halo tenki bazeia ba ninia mata dalan mak livru 2 Planu Asaun Annual, Orsamentu Jeral do Estadu.

Tanba ne’e, eventu Miss TL, programa ida ne’ebé la tama iha livru 2, liliu iha Ministériu Turizmu. Tuir peskiza ne’ebé Timor Post halo iha livru 2 OJE 2013, planu asaun annual Ministériu Turizmu 2013, husi pajina 300 to’o 309 la temi eventu Miss TL.

Maibé, temi de’it planu promove potensialidade turizmu TL hodi atrai turista nasionais no aumenta vizita turistika mak atividade Carnaval, Sunset Market (merkadu loraik) antes ne’e organiza iha Kristu Rei, Timoresia, Festival Caravana, Festival Ekonomia Solidária de Atauro, Festa Natal no Tinan Foun.

Seluk fali, hodi atrair turista internasionál no aumenta vizita turista internasionál mak Tour de Timor, Díli Maratona, Pesca Desportiva, Kompetisaun fotografias marinhas, Corrida de Beiros e Cavalos, Festival da cultura Fronteiriça. (max)

.