Komunikadu Inprensa bancada FRETILIN hasoru deklarasaun Presidente Tribunal Recurso

.

KOMUNIKADU 

Publiku Timor-Leste tomak rona ka hatene ona hosi media komunikasaun social konaba reasaun Sr. Presidente Tribunal de Recurso, Dr. Claudio Ximenes nian, ne’ebe reconhese halo bebeik kontaktu telefonika ho arguida ka kondenada Sra. Lúcia Lobato molok no hafoin desizaun Tribunal de Recurso iha 18 de Janeiro 2012. Sr. Claudio hatete katak kontaktu hirak ne’e nudar “kolega” maibe la hatete asuntu saida maka sira koalia.

Maibe, faktus ne’ebe mosu hafoin konversa telefonika mak ne’e:

 1. Condenada Lúcia Lobato hatama nia rekerimentu habeas corpus ba Tribunal de Recurso, hafoin Tribunal hasai desizaun ba rekerimentu ne’e ho akordaun 30 de Janeiro 2013 hosi koletivu juiz nain tolu ne’ebe Sr. Claudio maka preside no relator Juiz Jose Luis Goia;

2. Iha akordaun ne’ebe refere, Juiz Claudio Ximens vota kontra no halo nia votu vensidu ne’ebe simu fundamentu ne’ebe hato’o husi rekerente Sra Lúcia Lobato.

3. Juiz Claudio nia fundamentu iha votu vensidu ne’e la konsistente ka kontraria totalmente ho doutrina ne’ebe nia rasik hanorin no kontempla iha akordaun sira uluk (iha kazu ne’ebe hanesan maibe rekerente ema seluk) liu-liu akordaun ho data 12-10-2009, processo n. 01/HC/2009/TR, relator Claudio Ximenes no, akordaun ho data 31-3-2011, processo n. 71/CO/2009/TR, relator Jose Luis Goia;

4. Dadaun ne’e tama tiha ona rekursu extraordinariu foun ida tan; 5. Iha kontaktu permanente ho Sra. Margarida Veloso ne’ebe sai hanesan advogado informal ba Sra Lúcia Lobato. Hare hosi Kontaktu telefonika no faktus ne’ebe refere, hatudu momos katak; iha kombinasaun entre Sr. Claudio Ximenes husi parte ida no Sra Luúcia ho Sra Margarida husi parte seluk, konaba prosesu no konteudu recurso sira ne’ebe Sra Lúcia Lobato ho nia advogadu sira hato’o ba Tribunal.

Nune’e Sr. Claudio Ximenes viola nia dever de independencia, isenção e imparsialidade, no halo diskriminasaun iha aplikasaun lei ba ema ne’ebe iha osan, ka iha poder, no ba ema sira ne’ebe laiha kibiit. Nia sai fali hanesan defensor ba arguida ka kondenada ida iha prosesu tribunal.

Ne’e grave tebes ba juiz presidente tribunal a’as liu iha Timor-Leste, tanba afeta ba sitema justisa tomak. Juis sai fali hanesan advogado ka defensor “di belakang layar” ba interese arguido ka kondenado sira iha prosesu tribunal. Nune’e, Bankada FRETILIN husu ba Sr. Presidente Tribunal de Recurso, Dr. Claudio Ximenes, atu halo nia demisaun hosi cargo no funsaun ne’ebe iha, antes de Tribunal de Recurso hare hikas rekerimentu recurso extraordinariu foun hosi Sra Lúcia Lobato.

Dili, 18 de Abril 2013

Francisco M. Branco 

Vice-Presidente Bancada FRETILIN

.