“Isabel: Miss Timor Leste Promove Dignidade Feto”

.

Jornal Timor Post - Sabadu, 27 Abril 2013 

Primeira Dama Timor Leste (TL) Isabel Fereira hateten, kestaun ki’ak labele sai razaun atu kansela programa Miss Timor ne’ebe sei organiza husi Ministeriu Turizmu tanba programa refere mos bele promove dignidade feto TL. 

Tuir nia, Programa Miss Timor Leste komesa fo motivasaun ba sidadaun sira, liu-liu feto sira komesa fo importansia ba valores identidade Timor nian no proteje sira nia an hodi fo valor ba dignidade hanesan feto, tanba Miss la’os liga de’it ba bonita ou fiziku, maibe haree ba kapasidade intelektual liga ba espiritu umanizmu no domin ba nasaun familia no an rasik. 

“Hau konkorda tebes ho Miss TL, tanba haree iha parte pozitivu halo nusa maka motiva no inspira jovens sira bele hadomi liu sira nia nasaun no konese sira nia kultura,” dehan nia ba Jornalista, Sesta, (25/4), hafoin partisipa aniversariu JSMP iha salaun Delta Nova, Komoro, Dili. Isabel dehan, publikus barak konsidera Timor seidauk tempo atu organiza eventu Miss TL, tanba povu barak sei moris hela iha kiak nia laran, maibe, tuir Isabel, kestaun kiak laos razaun atu Timor Labele organiza eventu Miss TL, kestaun kiak laos hodi osan atu muda moris kiak, maibe tenki muda mentalidade no transforma mentalidade oinsa bele sai husi kiak, realidade estadu fo buat barak ona ba sidadaun la uza ho didi’ak. 

Nia fo ezemplo, estadu fo osan ba idozu no veteranus, osan hirak ne’e gasta hotu de’it no la produz ho diak, entaun agora tenki muda ona mentalidade hirak ne’e. 

 “Ki’ak ne’e ita rasik mak halo kiak, La’os ema mak halo ita kiak, tanba ne’e atu sai husi kiak tenke servisu maka’as no muda mentalidade ne’ebe depedensia liu ba estadu, ema riku ne’e laos estadu mak fo, maibe sira rasik mak serviso maka’as,” dehan nia. 

Tan ne’e, nia konsidera programa Miss Timor diak tebes, tanba la’os promove feto foin sae sira de’it maibe atu promove kultura Timor nian no lori identidade Timor ba aprezenta iha mundu internasional. Nia hatutan, kriteriu ba Miss Timor Leste mak konesementu jeral kona-ba siensia, iha lina ingles no portugues, politika, kapasidade intelejensia, no mentaldiade hodi dezenvolve saude no edukasaun. 

.