Isabel Ferreira hakat liu tiha ona barreira balun kona-ba nia estatuto hanesan espoza husi Presidente Republika

.

Frelino C Soares - Opinião

Ha'u hanoin senhora Isabel Ferreira hakat liu tiha ona barreira balun kona-ba nia estatuto hanesan espoza husi Presidente Republika nian hodi koalia kona-ba assunto publiko balun nian neebe hanesan ita tomak hatene katak ida nee sai hanesan knaar husi Governo nian, iha fatin seluk ha'u bele kumpriende katak iha situasaun ida hanesan dadauk nee senhora Isabel Ferreira goza hela tratamento espesial iha sosiedade nia let, hau bele dehan dalaruma mos husi ita nia komunikasaun sosial sira rasik.

Konfuzaun ba estatuto ida nee dalaruma kontribui mos hodi dada ita nia komunikasaun sosial sira hodi hakarak husi hanoin husi senhora Isabel Ferreira rasik kona-ba evento balun, neebe hanesan ita hotu rasik mos assisti katak Sra Isabel Ferreira mos fo duni nia komentariu balun no dalaruma mos lubun iha komunikasaun sosial sira nia kobertura, maibe ha'u fiar katak ita nia sosiedade Timor Leste evolui ona no sira mos hatene no maturo ona kona-ba lalaok funsionamento husi ita nian Estado neebe hatur iha ita nia sistema politiko nian.

Ha'u la hatene wainhira maka sra Isabel Ferreira bele reflekta no tetu nia aktu hirak nee, maibe nia konsekuenia mos ha'u hanoin mos bele mosu iha loron ikus mai tamba hanesan ita hotu hatene katak sim dadauk nee Sra. Isabel Ferreira hetan prevelijia iha estatuto hanesan espoza husi Presidente Republika Timor Leste nian maibe nia risko mos bele hamihis fali kualidade Sr. Taur Matan Ruak nian hanesan Presidente da Republika kona-ba nia knaar prinsipal sira. Tamba konkluzaun neebe maka iha alem de estatuto hanesan espoza husi sr. PR Taur Matan Ruak nian, ha'u la hare pozisaun seluk neebe maka hakait ba iha nia afirmasaun ikus-ikus nee iha media sira.

Ha'u hatene Sra. Isabel Ferreira iha mos knaar publiko nian neebe hanesan presidente ba equipa de promosaun Policia Nasional Timor Leste nian (PNTL) maibe se ita hakait ba iha atividade ikus neebe maka nia halo nee ha'u bele hatete katak la pertinente ho knaar nee no dook tebes.

Então ita atu dehan halo nusa!?? Se dehan nian hanesan emár politika ida nian mos buat nee mai ha'u ladun los no ha'u hanoin dalaruma emar barak bele hanoin hanesan ha'u nia konkluzaun tamba ita la hare nia atividade neebe hakait kona-ba Partido Politiko balun iha rai laran nian, ou dalaruma iha karik mos ida neé bele hamout liu tan tan kualidade presidencia husi Presidente Taur Matan Ruak nian. Ita fila fali ba iha afirmasaun neebe sra Isabel Ferreira fo sai iha Jornal Timor Post (neebe ha'u mos hakarak ho ksolok rekonhese katak sai emar Jornalista ida no aprende experiencia lubun boot husi diario nee rasik neebe ha'u bele dehan lori to'o ohin loron).

Maluk sira ha'u mos hakerek hanoin ida neé ho kuidado tebes atu hodi hato'o ha'u nia hanoin pedasuk-oan balun iha neé neebe ho intensaun katak atu labele mos prejudika emar balun iha nee maibe koko atu oferese buat neebe ba iha ita nia sosiedade atu lori hanoin lisuk.

Ikus liu iha fatin ida neé mos ha'u hakarak atu dehan deit katak Ita nia kualidade Governasaun neebe lidera husi Primeiro Ministro Xanana Gusmão, iha situasaun ida neé hanesan bele ha'u konsidera hanesan izame hotu ba iha Governo dadauk neé nian. Molok taka ha'u resposta hirak neé so ita bele hetan deit husi Primeiro Ministro, ita tomak hein.

Sincero.

.