Don Alberto Ricardo: “Sarani Katolika ‘Dehan Lae’ Ba Prostutuisaun”

.

Jornal Independente - Tersa-Feira, 02 Abril 2013 

Amu Bispu Dioseze Dili, Don Alberto Ricardo da Silva, preokupa ho atividade prostituisaun ne’ebe buras iha Timor Leste, tuir Don Ricardo atividade ne’e nu’udar sala boot kontra maromak. 

Amu Bispo hato’o kestaun ne’e bainhira diriji missa Laskua iha Igreija Katedral, Dili, Sabadu, (30/03) kalan. 

Timor-Leste nu’udar nasaun ne’ebe iha maioria sarani katolika iha reijaun Azia, tan ne’e Amu Ricardo husu sarani sira atu hapara atividade hirak ne’ebe konsidera hatun ema nia dignidade, liu-liu hatun dignidade sarani karolika iha Timor Leste. 

“Protistuisaun, abortu, trafiku umanu nu’udar hahalok ne’ebe hatu’un ema nia dignidade, sala bo’ot kontra maromak,” dehan Amu Ricardo iha nia Omilia. 

Tan ne’e, Amu Ricardo husu ba sarani katolika iha Timor Leste tomak atu hamoos aan husi hahalok hirak ne’ebe kontra maromak. Igreija nia doutrinha, tuir Amu Ricardo, hanorin ema atu labele pekadu, labele halo violensia, maibe tenki respeita malu nu’udar kriatura maromak nian. 

Amu Ricardo hatutan, igreija nia hakarak mak sarani katolika iha Timor Leste buka atu hametin unidade nasional nu’udar familia boot maromak nian.

.