Aniceto Guterres konferensia de imprensa hodi responde akuzasaun husi advogado Sra Lucia Lobato

.

DEKLARASAUN

Liu hosi media komunikasaun social hau hetan ona conhecimento konaba partisipasaun ka keisa ne’ebe  Sr. Jose Pedro Camões, Advogado Sra. Lúcia Lobato  nian, ne’ebe akuza hau halo krime denegação de justiça tanba dehan hau partisipa hamutuk ho Juizes: Maria Natércia, Rui Penha, no Cid Geraldo iha alterasaun ba distribuisaun prosesu atu desidi Habeas Corpus condenada Sra Lúcia Lobato nian. 

Ne’e hanesan surpreza ida, tanba hau nia servisu maka nudar deputadu iha Parlamentu Nasional. Ema hotu hatene, Juiza Maria Natércia hau nia kaben, hau conhece Juiz Rui Penha apenas nudar hau nia kaben nia kolega servisu, maibe nunka iha contaktu; no seluk maka Juiz Cid Geraldo hau nem conhece maibe hau hatene nia mos hau nia kaben nia kolega servisu ida iha Tribunal de Recurso. Oin sa, mak hau bele hamutuk ho juiz sira ne’e hodi halo alterasaun ba distribuisaun ba prosesu  ida iha Tribunal? 

Juizes, oficiais justiça, no funsionarios tomak iha Tribunal Recurso maka bele fo sasin ba ida ne’e. Sr, Advogado Jose Pedro Camões, ema ida ne’ebe matenek iha Lei Penal no Lei Prosesual Penal, nia hatene liu hau atu esklarese ba publiku tomak konaba oin sa mak bele uza  ema seluk nia komunikasaun privadu hodi akuza ema ida. Nia hatene liu oinsa konprova akuzasaun ho fundamentos no faktus konaba hau  nia partisipasaun ida ne’e.

Hau conhese mos Sra. Margarida Veloso, ema ne’ebe hakerek surat ba Conselho Superior Magistratura Judicial Timor Leste hodi divulga e-mail particular entre nia ho Juiz Rui Penha. Nia juiza jubiladu (pensiunan) ida tanba inkapasidade fisika, iha Portugal, no hanesan nia hatete ona iha nia surat katak nia uluk servisu iha Tribunal de Recurso nudar Juiza Inspetora, no dala barak sai asesora informal ba Presidente Tribunal Recurso Dr. Claudio Ximenes. 

Nia mos dala barak oferese an fo ideias no hakerek dokumentu defeza fo ba advogado sira hodi defende Sra Lúcia Lobato, no iha kontaktu permanente ho Presidente Claudio Ximenes.

Nudar sidadaun no politiku ida, hau respeita sitema justiça iha Timor-Leste, hau mos respeita tebes independensia, inparsialidade no reconhece dignidade juiz sira nian.

Hau laiha interese ho Sra Lúcia Lobato nia kazu, maibe tuir saida mak hau acompanha no hau hatene Juis Presidente Tribunal Recurso mak iha liu interese ho kazu ne’e. Sr. Claudio Xiemens envolve directa liu hosi kontaktu telefonika ho Sra. Lúcia Lobato antes no depois de Tribunal de Recurso hasai akordaun, no indiretamente liu hosi Sra Margarida Veloso.  

Sr. Claudio Ximenes mos halo kritika maka’as juiz koletivu ne’ebe hasai akordaun Tribunal Recurso no Distrital nian konaba prosesu hanesan, no promete ba Sra Lúcia atu hare fali kazu ne’e no liberta nia.  Nune’e, nia uza nia pozisaun nudar presidente hodi tenta maneira oioin atu kumpri nia promesa, no ikus  nia hatudu duni nia parsialidade hodi desidi afavor ba Sra. Lúcia iha akordaun konaba Habeas Corpus, maske ho voto vencido hasoru juiz nain rua seluk iha koletivu nia laran. Agora nia hamutuk ho advogado sira hases juis sira seluk iha Tribunal Recurso ho akuzasaun ida ne’e, atu nune’e nia bele hare fila fali Sra Lúcia Lobato nia recurso extraordinario no Habeas Corpus foun ida tan ne’ebe agora dadauk iha ona Tribunal de Recurso.

Iha sistema justiça ne’ebe deit, iha Timor-Leste, ate mesmo iha Portugal, la admiti Juiz Presidente Tribunal Supremo ida frekuentemente halo kontaktu ho arguida ka kondenada ida ne’ebe nia prosesu lao hela iha tribunal ne’ebe nia lidera. Hahalok hanesan ne’e gravemente viola ona deveres etikus no deontologikas juis nian, nudar dever de idependensia, reserva, izensaun no imparsialidade.

Nune’e, klaru ona, se los maka laiha imparsialidade no independensia, no se los maka halo krime coação de magistrado no krime denegação de justiça ne’ebe Sr. Jose Pedro Camões suspeita dadaun ne’e. 

Hau konsidera hanesan tentativa atu deskredita no harahun sistema justice liu hosi politizasaun, afastamentu juiz tribunal recurso sira seluk. Hau inocente iha kazu ida ne’e, no sai vitima ba konspirasaun no jogus de interese iha tribunal nia laran. Sei to’o momentu ida ba hau atu apresenta keixa konaba krime denúncia caluniosa, no insisti hau nia bom nome e reputação.

Dili, 17 de Abril de 2013
Aniceto Guterres
.