Prokuradór Kondena Jornalista Na’in 2 Tama Kadeia Tinan 3

,

Ekipa INDEPENDENTE - Jornal Independente - 01-03-2013

DILI : Tribunál Distritu Dili (TDD), (28/2) horisehik, halo julgamentu ba jornalista Raimundus Oki husi jornál INDEPENDENTE no Óscar Salsinha husi jornál STL, bazeia publikasaun jornál kona-ba prosesu justisa ba kazu asidente tráfiku ne'ebé hamate ema na’in 2 iha Oekusi, iha loron 18 Setembru 2011. 

Ba kazu ne’e, Ministériu Públiku (MP) determina arguidu na’in tolu (3), Raimundus Oki, Óscar Salsinha no Mateus Sufa ne’ebé sai nu’udar fonte informasaun ba notísia ne’e. 

Iha prosesu julgamentu ne’e, prokuradora Ivonia Guterres kondena jornalista Raimundus no Oscar tama kadeia tinan 3, suspensaun tinan 3 no selu indenizasaun. 

Nune’e, ba arguidu Mateus Sufa kondena tama kadeia tinan 1 no selu indenizasaun. Tuir kronolojia, iha Domingu 29 Janeiru 2012, Mateus Sufa arguidu iha kazu ne’e ba arguidu jornalista Raimundus Oki nia uma hodi esplika kona-ba prosesu kazu asidente tráfiku ne’ebé iha Distritu Oekusi hodi hamate nia inan no nia sobriña. 

Arguidu na’in rua (Oki no Sufa) ba fali arguidu jornalista Óscar Salsinha no fó informasaun ne’ebé hanesan atu bele publika iha jornál. Tuir deklarasaun Mateus Sufa, deklarasaun eskrita ne’ebé nia fó ba jornalista sira ne’e atu halo publikasaun kona-ba kazu ne’e, tanba nia rasik ba ona Prokuradoria Distritál Oekusi, maibé la hetan klarifikasaun klaru loloos kona-ba prosesu justisa kazu ne’e. Nune’e, iha loron 30 Janeiru jornál STL hatún notísia ida ho títulu deskonfia prokuradór simu subornu. 

Maibé, antes halo publikasaun jornál STL mós la halo klarifikasaun ba Prokuradoria Distritu Oekusi kona-ba notísia ne’e. 

Nune’e, iha loron 2 Fevereiru 2012 jornál INDEPENDETE mós hatún notísia kona-ba prosesu justisa ba kazu ne’e. Maibé, notísia jornál INDEPENDENTE ne’e iha diferensa ho STL. 

Notísia ne’ebé hatún konfirmandu ho Administrasaun Prokuradoria Distritu Oekusi no Prokuradór Distritu Oekusi, Jacinto Babo Soares iha tempu ne’ebá. 

La simu ho rezultadu publikasaun ne’ebé mak jornál STL no jornál INDEPENDENTE, parte prokuradór mós levanta kazu ne’e ba dalan justisa. Tuir deklarasaun lezadu, Jacinto Babo Soares, nia foin hatene notísia ne’ebé publika iha jornál STL hafoin Prokuradora Jerál Repúblika, Ana Pessoa informa ba nia. 

Nia dehan tan, publikasaun notísia iha jornál STL kona-ba simu subornu ne’e afetadu tebes ba nia psikolojia hodi halo nia kalan toba la dukur. Maski nune’e, nia dehan, depois publikasaun notísia ne’e prosesu kazu iha Prokuradoria Distritál Oekusi kontinua la’o normál. 

Kona-ba notísia husi STL rasik nia lakohi atu fó klarifikasaun, tanba ta'uk atu hamosu interpretasaun oin seluk husi jornál STL. Ne’e duni, hakarak atu lori kazu ne’e ba oin hodi deside liu husi dalan tribunál. Entretantu, kona-ba publikasaun iha jornál INDEPENDENTE rasik, nia foin hatene bainhira tuir prosesu julgamentu, horisehik. Julgamentu ne’e dirije husi Juis, António Hélder do Carmo, Prokuradora, Ivonia Guterres, arguidu Ramundus Oki no Óscar Salsinha hetan defeza husi Defensoria Públiku, Câncio Xavier no defeza ba arguidu Mateus Sufa husi Defesoria Públiku, Laura. 

Hafoin rona deklarasaun husi arguidu sira no lezadu, Juis António deside hodi foti desizaun finál ba kazu ne’e iha loron 14 Marsu tinan ne’e. Akuza Sala Timor-Leste Press Club (TLPC) no Asosiasaun Jornalista Timor-Leste (AJTL) kestiona makaas akuzasaun ba jornalista na’in rua Raimundus Oki no Oscar Salsinha.

Tanba tuir regra loloos, responsabilidade ba notísia ne’ebé publika iha média ruma tenke tuir nia ierarkia servisu. 

Ne’e duni, akuzasaun tenke ba instituisaun média ne’ebé jornalista servisu ba. Prezidente AJTL, Tito Filipe hateten, sistema servisu média ne’e klaru loos. 

Média ida harii ho knaar atu fó sai informasaun. Média iha ninia estrutura hanesan diretór, xefe redasaun no editór no liu husi reuniaun mak sei deside hodi halo halo kobertura ho publika informasaun. 

Knaar jornalista loloos iha servisu média nian mak hetan orientasaun husi responsavel sira hanesan xefe redasaun no koordenadór kobertura hodi rekolla informasaun iha terenu.

Nune’e, antes atu halo publikasaun sei liu husi reuniaun ida hodi determina notísia ne’e prienxe kritériu atu publika ka lae. Nune’e, editór iha kada média mós sei haree katak notísia ne’e bele publika ka lae. Ne’e duni, desizaun ikus atu hasai notísia ruma iha editór nia liman. 

Responsabilidade tomak ba notísia ne’ebé publika iha Xefe Redasaun no Xefe Editór nia liman, tanba sira mak sei deside. “Notísia ne'ebé fó sai ne’e kumpre ona profisaun jornalista nian, notísia ne’e válidu ne'ebé entermus jornalista INDEPENDENTE ho STL ne’e la sala iha kazu ne’e,” dehan Tito. 

Liafuan hanesan mós hato'o husi portavós TLPC, Lirio Fonseca. Tuir nia, responsabilidade ba notísia atu hatún ka lae ne’e responsavel editór nian. Sira mak hatene la’ós jornalista. “Jornalista so lori notísia mai hakerek tau iha ne'ebá editór mak deside notísia ne’e atu tuun ka lae. Ne'ebé, akuzasaun ida hanesan ne’e ba ha'u sala,” nia hateten. 

Tuir nia, kuandu iha kazu ne’e mak jornalista ne’e tama duni kadeia sei fó ameasa boot ba servisu jornalista hotu. “Ha’u sente Ministériu Públiku tenke muda akuzasaun ne’e. Surat akuzasaun ne’e tenke haruka ba instituisaun. Instituisaun mak deside fali se mak responsavel ba notísia ne’e,” tenik Lirio. 

Diskorda Entretantu, organizasaun naun governamentál Lalenok ba Ema Hotu (LABEH) diskorda totál alegasaun husi Ministériu Públiku (MP) hodi hasoru jornalista jornál INDEPENDENTE Raimundus Oki. Tanba tuir avaliasaun ne’ebé LABEH halo la hetan indikasaun kontra lei. 

Diretór ezekutivu LABEH, Júlio da Silva Guterres hateten, notísia ne'ebé publika kobre tiha ona both side no fonte informasaun kredivel no konfronta tiha ona informasaun ka faktu sira. Husi prinsípiu balansu jornalizmu nian, nia dehan, artigu ne’e laiha liafuan difamasaun iha notísia laran, laiha tendénsia pesoál jornalista nian no laiha opiniaun pesoál jornalista nian nune’e mós akuzadu hetan tiha ona oportunidade atu responde. 

Husi parte Aspetu legál nian, LABEH analiza katak, notísia ne'ebé INDEPENDENTE Publika, la viola kódigu konduta jornalizmu nian. Tuir LABEH , iha kontestu Indonézia, Lei Imprensa Númeru 40/ 1999 konsidera nu'udar Lex Specialis no Kódigu Penál nu'udar Les Generalis. 

Iha kontestu “Lex specialis derrogat lex generalis”, signifika katak pers ne'ebé halo asaun penál, labele hodi fali Kódigu Penál atu julga maibé tenke Lei Imprensa. Tuir lei ne’e iha artigu 18 alínea 2, jornalista ne'ebé hakerek notísia labele hetan pena no autór notísia iha média imprime ne’e responsabilidade kompañia imprensa ne'ebé Xefe Editór mak reprezenta, tanba lei ne’e laiha konteúdu kona-ba responsabilidade pesoál nu’udar sa mak vigor iha Penál Komum. 

Haree ba Artigu 18 alínea 1, 2 no 3 husi Lei Imprensa ne’e laiha konteúdu ne'ebé prevee kona-ba insulta no difamasaun ne'ebé nia responsabilidade tenke husu diretamente ba ema ne'ebé mak iha indikasaun halo asaun ne’e. Insulta no difamasaun prevee tiha iha Kódigu Penál, iha Artigu 310-311. 

Nune’e LABEH haree katak, aktu julgamentu ne’e hanesan laiha fatin no LABEH diskorda totalmente no hare katak maneira ne’e iha tendénsia liu atu fó minimiza karakter no korajen média nasionál sira atu iha brani liu tan hodi hakerek investigasaun nian. 

Analiza ba situasaun ikus kona-ba kazu ne'ebé hasoru Jornalista, LABEH husu ba Sekretáriu Estadu Komunikasaun Sosiál atu tau matan ba kriasaun Lei Imprensa ne'ebé bele asegura papél jornalista nian iha aspetu legál no fó esplikasaun detalla kona-ba knaar profisionál média nian atu bele kontribui di'ak liu tan ba prosesu hari nasaun, kombate korrupsaun no promove boa governasaun, transparénsia no akuntabilidade. 

,