PN La Konkorda Despaisu MS Limita Servisu Jornalista

.

Eladio Faculto

Jornal Independente - Husi: Joao Costa - 04-03-2013

DILI : Reprezentante povu iha uma fukun Parlamentu Nasional (PN), la konkorda ho despaisu Ministeiru Saude (MS), ne’ebe fo ba pesoal sauda sira iha Hospital Nasional Guido Valadares (HNGV), Dili, labele fo informasaun ba media tanba liberdade imprensa presiza tebes iha nasaun ida ne'e. 

Presidenti komisaun F, Parlamentu Nasional (PN), Virgilo Ornai hatete, povu presiza nakloke no hatene buat ruma hanesan atendiementu saude iha ospital nasional tanba ne'e nudar fatin publiku.

“Hau hanoin internalmente sira (MS)bele halo gestaun maibe la bele taka dalan ba ita bo’ot sira (media) tanba ita atu hadia malu ne’e liu husi informasaun,” hatete Virgilo iha PN sesta foin lalais ne’e.

Nia hatutan, karik ema ida mak servisu la diak ka orogante so komunidade sira mak bele halo kontrolu tanba ne’e ema ne’ebe nudar funsionariu publiku la bele taka an ba media.

“Hau hanoin nudar funsionariu publiku tenki nakloke ba publiku (atu publiku be;e) halo kontrolu ba ita nia servisu. Ita la bele taka an ba media ejerse nia knar hodi sai hanesan kontrolu sosial tanba sein media ita hotu la hatene katak imformasaun sira ne’ebe lao to’o ona iha ne’ebe,” hatete Virgilo.

Iha fatin hanesan deputadu bankada Fretelin Eladio Fakulto hatete, MS nia desizaun ne’e tuir nia la los tanba povu presiza informasaun kona ba saude nian.

“Hau hanoin ministru ninia desizaun limite ema para labele hetan informasoens,” dehan nia.

Nia hatutan, informasaun laos atu konsumu ba media sira, maibe media transmite ba sosiedade atu bele asesu ba informasaun kona ba moras ne’ebe daet husi ra’an hanesan HIV/AIDS, Tubelucose, Malaria. 

“Imi (media)mak bele transmite ba sosiedade atu bele hatene informasaun, laos nia (Ministeriu Saude) mak transmite ba sosiedade. Hau hanoin Ministru atu limita ba asuntu hotu, hau hanesan membru PN hau la konkorda no la simu ida ne’e tanba kebijakan pilitik ida ne’ebe la los,” dehan Eladio. 

Eladio dehan, nia mos ladauk hatene informasaun kona ba despaisu MS nian.

“Hau sei husu klarifikasaun politika governu nian ba assuntu ne’ebe ita bo’ot sira husu mai hau. MS mos labele hakfodak ho korupsaun foti despaisu hanesan ne’e,” dehan Eladio. 

Nia hatutan, media sira atu publika kona ba moras ne’ebe mak sirkula iha TL ba povo atu hatene ne’e diak hakerek no publika deit labele tauk atu hatete. 

Antes ne’e Ministru Saude Sergio Lobo hatu'un despaisu ba ema mediku sira iha ospital nasional atu labele fo informasaun ba media atu publika.

Ministeriu Saude sei fo sansaun disiplinar kuandu pesoal saude ruma iha HNGV fo informasaun ba media.

,