PM Xanana Gusmao; “Lider CPD-RDTL Manipula Membru Sira”

,

Jornal Timor Post - Sesta-feira, 08 Marsu 2013 

Primeiru Ministru (PM) Xanana Gusmao rekonese katak, lider konsellu Popular Demokratika-Republika Demokratika Timor Leste (CPD-RDTL) manipula ninia membru sira atu la halo kartaun eleitoral no labele tuir eleisaun tanba governu no estadu ne’e seidauk loos. 

“Hau admira lider CPD manipula lider sira atu la ba tuir vota no labele halo kartaun eleitoral, maibe, lider sira tuir hela votasaun, sira iha pasaporte no dala barak pasiar hela ba rai liur,” Xanana ba Jornalista sira iha edifisiu Ministeriu Negosiu estranjeiru no Kooperasaun (MNEK), Pantai Kelapa, Kinta (07/3). 

Xanana fo hanoin, membru CPD tenki matan moris no buka atu hatene loloos CPD ninia lalaok, tanba se lae, membru CPD la hatene ninia moris atu ba iha ne’ebe. 

“Durante ne’e membru CPD nunka hakfodak tanbasa mak sira labele halo kartaun eleitoral maibe lider sira bele halo,” nia esplika. Ne’eduni, Xanana apela ba membru CPD-RDTL tenki matan moris no labele dukur, tanba diretu ema ida nian hetan ona manipulasaun husi ema seluk ne’ebe nunka rekonese estadu no governu ninia papel. 

“Membru sira barak mak nunka hateten loloos sira atu halo saida iha futuramente, tanba ema ne’ebe mak matenek nia mak sa’e nafatin no ida ne’ebe la hetan edukasaun sei la hetan kontinuasaun, ne’e politika manipulasaun hodi taka dalan ba membrus atu la hetan identidade iha nasaun ne’e no taka ona dalan ba demokrasia iha nasaun ne’e,” Xefi Governu informa. 

Nune’e mos Xanana tenik, Timor Leste besik ona tinan 11 independensia no besik mos tinan 14 referendum, ne’eduni, laiha ema ida mak bele terinetik prosesu dezenvolvimentu nasaun ida ne’e nian. 

Ita atu deskute klean liu tan kona ba asuntu sira ne’e, ita presiza konfirma didiak ita nia-an katak, ita atu koalia ne’e inkonstitusional ka lae, kuandu grupu ida hakarak hari’i fali ninia estadu ketak husi istoria ne’ebe hanesan no luta ba dalan ida deit,” nia haklaken.

,