“PM Xanana: CPD-RDTL Lalika Halimar Ho Ha’u”

.

Jornal Independente - Kinta-feira, 07 Marsu 2013 

Primeiru Ministru Kay Rala Xanana Gusmao husu grupu CPD-RDTL atu lalika halimar ho estatutu seluk ne’ebe konsidera hanesan anti konstituisaun RDTL. 

“Se CPD-RDTL hanoin nia estatutu seluk, ida ne’e inkonstitusional, hau la dehan illegal, hau dehan inkonstitusional, anti ita nia konstitusional, labele mai koalia fali konstituisaun ho hau, tanba la’os hau mak halo konstituisaun, labele mai fali koalia leis ho hau tanba sira la simu, sira la vota, enkuantu sira nia lider balun vota hela, iha hela kartaun (eleitoral), iha pasaporte ba pasiar iha rai liur, hau konese professor balun CPD-RDTL, i depois simu hela osan estadu, reklama tan sira nia diretu depois hanorin ita nia povu ne’ebe simples teb-etebs dehan katak ita mak restaura,” deklara PM Xanana hafoin halo enkontru ho Prezidenti Republika iha palasiu PR, (06/3). 

Maski nune’e, PM Xanana admira ho displina no mobilizasaun ema ne’ebe grupu CPD halo, maibe nia labele premiti atu CPD ba okupa fali ema nia rai. 

“Ne’e duni hau dehan ba Prezidenti Republika Taur Matan Ruak katak, ami sei hasai CPD-RDTL sira husi ne’eba, sei la oho, sei la book, sira sai husi ne’eba.” 

“Hau uluk FRETILIN, maibe hau nunka reklama katak hau fundador, hau labele, se dehan katak hau kontinua duru, hau bele simu, hau nunka dehan katak hau mak dirasaun superior husi 1974, lae, hau tama ikus.” 

“Se temi baze de apoiu, hau mos iha baze de apoiu, atu temi reorganiza luta, hau mak reorganiza, ne’ebe lalika, ho hau lalika halimar,” hateten Xefi Governu ne’e. 

Xanana dehan Governu harii ona komisaun ida hodi halo kalklu ba produtu ne’ebe grupu CPD sira produs iha welaluhu atu sosa. 

“Ami harii ona komisaun ida, atu estadu, atu haree took, halo kalklu ida katak iha ne’eba sei sai tonelada hira, estadu sei sosa, envez sosa husi fatin seluk, sei sosa husi ne’eba, sira sai, ami sei sosa,” deklara xanana. 

Nune’e, PM Xanana hateten, governu tau ona osan atu apoiu CPD sira hodi halo kooperativa iha ida-idak ninia distritu, no prepara mos osan atu sosa fini. 

“MAP sei fo ajuda ba mais iha ida-idak nia fatin, ida ne’e mak ita dehan katak ita hotu tuir lei, ita hotu respeita lei,” dehan nia.

” Sira ba tiha, ba fali sira nia fatin, halo kooperativa ne’ebe ami atu fo apoiu, iha ne’eba kuandu sira hakarak husu mos para aseita ona ejistensia estadu ida ne’e karik sira bele.” 

“Agora sira tenki organiza aan hodi aplika enerjia, sira nia kbiit mobiliza, kbiit dixplina iha fatin hotu-hotu, labele ita ba fatin seluk, ita dehan rai ne’e ami nian, la diak,” katak PM Xanana. 

,