“Oecusse Sai Projetu Pilotu Master Plan”

.

Jornal Nacional Diario - Kuarta-Feira, 20 Marsu 2013

Master Plan ba Projetu harii Zona Ekonomia Social no Merkadu sei lori Dezenvolvimentu Timor Leste avansa liu tamba sei dada investor sira mai investe iha Timor Leste. 

Eis Primeiru Ministru, Mari Alkatiri hatete projeitu pilotu ba harii master plan ne’e sei hahu husi Distritu oecusse depois mak sei alarga tan ba Distritu sira seluk iha Timor Leste laran tomak.

 “Benefisiu mak atu harii master plan ita komesa ona atu dada ema hanesan investidores sira ke laos husi Portugal deit, iha Singapura rasik hau hasoru malu ho potensiais investidor sira, dada investidor sira, dada sira profesionais halo estudu komparativu ba zona sira seluk para it abele hahu ne’e benefisiu maka ida ne’e, ema barak intersante atu investe iha Zona sira ne’e iha oecusse especial Timor Leste,” dehan Mari Alkatiri ba Jornalista sira Aero Portu Comoro, Tersa (19/3) hafoin fila husi vizita durante semana rua iha Portugal no Singapura.

Eis Primeiru Ministru iha Primeiro Governu konstitusional ne’e dehan, importante ba Timor Leste agora mak tenki kria kondisoens hanesan aprova leis hodi bele fo garantia ba ema ne’ebe mak atu mai investe iha Timor Leste, maibe presiza mos hadia infraestrutura, edukasaun, saude no selu-seluk tan.

“Kondisoens ita mak tenki bele harii, maibe ita deside atu halo zonas especial de ekonomia social de merkado ita tenki parova leis ke garantia ba sira mai investe la lakon osan, ita tenki aprova politik klaru, programas buat sira ne’e hotu, ne’e mak hau dehan ne’e master plan ida,” hateten Alkatiri.

Servisu ne’ebe mak eis Primeiru Ministru iha Primeiru Governu Konstitusional halao ne’e atu harii Zonas especiais ekonomia social atu halao dezenvolvimentu tuir prosesu ida foun atu halo dezenvolvimentu tuir regras foun hodi iha objetivu nafatin atu kombate kiak iha Timor Leste.

Sekretariu Jeral Partidu ne’ebe halo Istoria FRETILIN ne’e dehan tan katak, durante semana rua iha nia vizita ne’e hasoru malu ho profesionais barak iha areas oi-oin para bele halo master plan ba projeitu pilotu ne’ebe maka atu hahu iha Wekusse, tantu projeitu refere sei harii mos iha Distritu sira seluk.

“Iha semana rua nia laran iha Portugal halao kontaktus barak i serviso mos ho profesionais barak, arkitetus, injineirus, ekonomistas, jurista oi-oin par abele halo maste plan ida ba projeitu piloto signifika katak ita hahu iha Oecusse, Oecusse sai projeitu pilotu i depois maka ita sei haree atu lori fali esperensia ne’e ba Distritu seluk,” haktuir Alkatiri.

Kona ba projeitu ne’ebe refere, Eis Primeiru Ministru, Dr. Mari Alaktiri sei hato’o mos ba atual Primeiru Ministru, Kay Rala xanana Gusmao, Prezidenti da Republika (PR), Taur Matan Ruak inklui membru Governu balun.

Eis Primeiru Ministru ne’e haktuir, sekuandu master plan lao tiha ona dezenvolvimentu Timor Leste diak liu especialmente pante Makasar, tanba ne’e presiza duni servisu maka’as no kolaborasaun estadu, Governu, Parlamentu Nasional no sosiedade tomak.

“Pante makasar sei sai hanesan hotu, se sasan hotu-hotu lao ho diak, ne’e laos mehi ninian, ne’e hau serviso mak buat ne’e bele sai lori tempu balu mas tenke iha servisu liu-liu husi Oecusse oan sira mos tenki servisu para sasan sira ne’e bele lao ho diak,” Alkatiri Optimista.

Mari Alkatiri dehan tan, kriasaun Zonas espesiais de ekonomia social de merkado ne’e fundu dezenvolvimentu ida especial ne’ebe fundu dekombate kiak ne’ebe fundu rua ne’e bele tau iha ida-idak ba ninia jestaun hodi dezenvolvimentu bele lao nafatin, signifika kiak mos menus ba beibeik, labele dezenvolvimentu ba ema balun ma riku deit I balun kiak nafatin.

 “Ida ne’e mak ideias, filozofia foun, modelhu foun de dezenvolvimento ke atu ahu iha Timor Leste, biar iha Zonas ekonomiku especial iha rai barak balu ho susesu balun laiha, ita bolu Zona especial ekonomia social de merkado, tantu iha filozofia foun ida iha ne’e atu ita harii modelhu foun para objetivu ultima mak atu hatun pobreza, hatun kiak, tan nune’e mak hau dehan, servisu barak atu halo, maibe hau rasik optimista tebes depende deit ba partisipasaun maluk sira,” dehan Alkatiri.

Nia informa tan katak, ekipa ida internasional harii tiha ona atu serviso hamutuk ho nia (Alkatiri) sei harii mos ekipa ida nasional Timor Leste para atu bele serviso hamutuk nia, ne’e presija ema profisional, enjineiru, ekonomista, jurista, no sleuk tan.

 Iha tempu badak sei hamutuk ho Ptimeiru Ministru, Kay Rala xanana Gusmao sei halao konferensia hodi informa ba publiku saida mak projeitu master plan, ninia signifika saida no orsamentu hira mak atu gasta no mos tinan hira mak atu harii sidade foun iha Oecusse.

.