MP Akuza Gil Alves Pena Prizaun Tinan 7 “Arguido Henrique Tinan 6”

.

Jornal Nacional Diario - Sesta-feira, 01 Marsu 2013 

Liu husi terseira julgamentu ba kazu eis Sekretariu Jeral Partidu ASDT, Gil da Costa Alves, Kinta (28/2), iha Tribunal Distrital Dili (TDD), Ministeriu Publiku (MP) halo akuzasaun ba Gil Alves ho pena prizaun tinan hitu (7). 

Ministeriu Publiku mos halo alegasaun ba Arguido Herique Carlos, nudar Financas Partidu ASDT nian ne’ebe deskonfia hamutuk ho Gil Alves halakon osan ho montante U$195.000,00 ne’ebe transfere husi estadu ba konta bankaria partidu ASDT nian hodi fasilita halo kampania politika ba partidu ASDT iha eleisaun jeral 2012. 

Eis Ministru Turizmu, Comersiu no Industria (MTCI), Gil da Costa Alves ho nia Camarada Henrique Carlos, utiliz aosan partidu ASDT nian ne’ebe tuir lolos tenke transfere ba konta Bancaria ASDT versaun Joao Correia. Prokurador Jose Ximenes, ne’ebe reprejenta MP halo alegasaun ida ne’e ba Gil Alves ho Henrique Carlos, bazeia ba faktus testamunha balun katak, arguido nain rua uza osan ne’e la illegal, tanba Tribunal rekurusu fo tiha ona lejitimidade legal ba ASDT versaun Joao Correia. 

MP akuza Gil Alves ho Henrique ho krimi Burla Agravado 267 kodigu penal Timor Leste no ho krime pekulato agravado artigu 295 hamutuk ho artigu 302. 

Hafoin rona tiha akuzasaun MP nian ne’e, defeza arguido nain rua nian, Jose Manuel Gomes, husu ba Tribunal atu absolve tiha alegasaun MP nian ne’e, tanba rguido nain rua la utiliza osan ne’e ba interese privadu, maibe uza mos osan ne’e ba atividade partidu ASDT nian, maske, tuir lolos sira la iha kompetensia atu uz aosan ne’e. 

Advogado Jose Manuel Gomes, mos fo rajaun katak, bazeia ba testamunha Vicente Soares hanesan vice Prezidenti ASDT no mos atual sekretariu jeral ASDT mos rekonese ona katak, iha loron 30 fulan agusto 2012, nia mos simu osan restu iha konta bankaria ASDT husi Arguido Gil Alves. 

Maibe, iha fali tribunal Vicente nega fali dehan, asinatura ne’ebe nia halo hodi simu osan husi Gil Alves ne’e falsu. Antes atu tama ba alegasaun MP, Tribunal rona uluk testamunha Francisco Soares hanesan Prezidenti ASDT Distritu Manatutu, ne’ebe konfesa ba Tribunal katak, iha tinan 2011-2012 nia simu duni osan husi arguido U$5.848 hodi utiliza ba atividade kongresu partidu ASDT distrital no mos ba atividade kampania eleisaun lejislativu 2012. 

Kazu ne’e prezidi husi Juiz Koletivu, Jose Maria de Araujo, Paulo Texeira ho Duarte Tilman, ne’e hadia hikas fali ba loron 21 fulan Marsu, tinan ne’e, hodi rona leitura akordaun. 

.