“Ministru Saude Viola Konstituisaun”

,

Jornal Independente - Sesta-feira, 08 Marsu 2013 

Organizasaun Media Timor-Leste no Jornalista Timoroan diskorda despaisu Ministru saude nian hodi limite nia funsionariu labele koalia ho media atu publika informasaun ruma. 

Tuir Jornalista Timor oan katak, desizaun Ministru Saude nian hodi limite nia funsionariu labele koalia ho media atu publika. 

Tuir Jornalista Timor-oan katak desizaun Ministru saude nian ne’e viola konstituisaun RDTL iha artigu 40 no 42, ne’ebe koalia kona ba liberdade da imprensa no sidadaun iha direitu ba expresaun. 

Tanba, tuir jornalista sira katak Ministeriu Saude tuun ba nia diresaun tomak liliu Hospital Nasional Guido valadares interese tebes atu povu presiza akompania progresu kondisaun hospital no pasiente sira, nune’e, kada diresaun presiza fo informasaun ne’ebe adekuadu ba media hodi publiku hatene. 

Presidenti Asosiasaun Jornalista Timor Leste (AJTL), Tito Filipe hatete, nia parte lakohi mete liu servisu tekniku ne’ebe MS halo tanba nia konsidera politikamente despaisu ne’e MS nia diretu estabelese politika atu limite funsionariu sira hodi fo informasaun. 

“Maibe preokupasaun ba ita maka despaisu hanesan MS nia presiza esplikasaun tanba karik buat ruma lalos nomos MS laiha diretu atu limite ema nia expresaun no liberdade imprensa,” dehan Tito ba Independente iha RTTL Kaikoli, Dili, horseik. 

Kona ba despaisu MS ba mediku sira labele fo informasaun ba media hodi publika, tuir Tito katak, ne’e Ministeriu Saude Sergio Lobo tau ona fatuk bo’ot entre Mediku sira ho media. 

Prezidenti AJTL ne’e hatutan, Ministru ida limiti nia Staff atu koalia ho media ne’e normal maibe hanesan nasaun demokratiku Timor-Leste labele akontese ba limitasaun inprensa no expresaun tanba papel media hanesan kontrola social atu halo kobertura ba asuntu ne’ebe importante ba publiku. 

“Papel media atu informa, eduka no diverta no sai kontrolu social tanba ne’e laos ona tempu atu limita servisu jornalista,” Tito informa. 

Nia hatutan, tuir lolos MS agradese media tanba durante ne’e media hasai ona informasaun barak ba publiku hodi promove Ministeriu Saude nia servisu. 

 Entertantu, Jornalista Diario Timor Post, Jose Neves informa, nia parte la aseita despaisu ne’ebe Ministeriu hatun tanba publiku hakarak akompania progresu saude iha TL, liliu ba moras inklui tratamentu iha Hospital rasik.

.