Maijen Lere: “Joven Balun Kontinua ‘Mutu Rabu”

.

Jornal Nacional Diario - Sesta-feira, 08 Marsu 2013 

Xefi Estadu Maior FALINTIL-Forsa Defesa Timor leste (F-FDTL) Maijor Jeneral (Maijen), Lere Anan Timur afirma katak, maske iha joven balun maka kontinua halo problema ‘Mutu rabu’ iha fati-fatin maibe situasaun em jeral iha rai laran la’o normal. 

“Situasuan rai laran ita kompara ho nasaun sira seluk ita nia diak liu, Timor Leste balun akontese mutu rabu mais hau hanoin katak diak hela,” dehan Maijor Jeneral Lere Anan Timur ba Jornalista sira iha Palasiu Prezidensial Aitarak Laran, Dili, hafoin informa situasaun rai laran ba Xefi Estadu Taur Matan Ruak, kinta (07/03). 

Konaba Problema Massa CPD-RDTL iha Welaluhu, Maijor Jeneral Lere Anan Timur, informa katak, entidades kompotentes koalia beibeik maibe laiha solusaun nafatin tanba ne’e Lere Anan dehan Governu mak tenki responde. “CPD-RDTL nian ne’e ita koalia beibeik, ema mak ne’e nafatin, ne’e desizaun husi governu nian, governu maka hatene,” Lere Anan Timor afirma. 

Lere Anan Timur mos reafirma tan katak, CPD-RDTL nia aktividades halo koperativa iha Welaluhu, Sub Distritu Fatuberlihu, Distritu Manufahi ne’e diak, maibe CPD nia sala mak okupa ilegalmente, laiha kordenasaun ho rain ain no lider komunitariu sira iha area ne’eba. 

Maibe Lere Anan Timur fundamenta, oras ne’e dadaun Governu liu husi Konsellu Ministru aprova ona rezolusaun ida atu hasai CPD husi fatin ne’eba, maibe karik laiha kooperasaun husu membru CPD atu fila ba sira nia fatin ida-idak ka Distritu ida-idak maka PNTL, sei uza forsa hodi hasai membru CPD husi fatin ne’eba. Lere Anan Timur esplika, F-FDTL pronto apoiu PNTL atu hasai membru CPD-RDTL husi fatin Welaluhu karik iha ona consensus husi Prezidenti da Republika Taur Matan Ruak no Primeiru Ministru Kay Rala Xanana Gusmao, tanba ne’e F-FDTL pronto iha 24 oras hein desizaun atu apoiu PNTL hasai CPD-RDTL. 

“Atu ajuda PNTL ne’e tuir ita nia lei defeza ninian, Prezidenti, Primeiru Ministru tur hamutuk, sira consensus depois ami bele fo ami nia apoiu ba PNTL, se kuandu PNTL husu ami fo apoiu ne’ebe ke nesesariu, F-FDTL ne’e prepara loron kalan hela deit iha 24 horas,” Lere Anan Timur afirma. 

,