La Sama La Konsidera Media Hanesan Lixu

.

Jornal Independente - 05-03-2013

DILI:Vise Primeiru Ministru Fernando La Sama de Araujo esklarese ba públiku katak nia la konsidera media hanesan lixu.

Tuir La Sama katak lian-fuan lixu ne’e opiniaun jornalista nia balun, tanba iha nia komprensaun ba surat tahan aat ne’e iha lian-Indonesia katak selebaran.

Entretantu, tuir diario ne’e públika iha loron 25 fulan Fevereiru tinan ida ne’e, vise Primeiru Ministru La Sama ne’e konsidera jornal hanesan lixu tanba dehan (jornal) hanesan surat tahan aat atu hakerek kazu Ministra Emilia nian serkula iha konferensia g+7.

“Apela ba maluk jornalista sira katak, ita Timor-oan lidera hela inkontru boot ida ne’ebé nasaun 45 maka mai, nu’udar orgullu boot ida ba ita, tanba mundu hateke hetan ita, no mundu simpatia ba ita, e lalalika lori surat tahan aat bo’ot (Jornal) ne’e ba sirkula fali iha inkontru ne’e, tanba ita iha dalan atu rezolve,”nia apela.

Tuir La Sama katak publikasaun ne’e ladun hatudu konteudu hosi konferensia imprensa ka ideia ne’ebé nia hato’o.

Nia dehan, lia-fuan lixu ne’e interpretasaun jornalista balu nian ne’ebé liga fali ba jornal balu nia naran. Nune’e nia esklarese lia-fuan ne’e, la sai husi nia ibun maibé opiniaun jornalista balun nia rasik.

“Iha esplikasaun, ha’u mos fó ezemplu, se bele, atu labele sirkula fali surat tahan at ruma iha konferensia ne’e, tanba bainaka husi nasaun 48, ne’ebé respeita tebes ita, mak partisipa iha eventu ida ne’e. Ha’u nia komprensaun surat tahan at ne’e, iha bahasa Indonesia karik, dehan selebaran. Maibé interpretasaun jornalista balu dehan fali jornal no jornalista balu liga fali tan ho jornal balu nia naran,”La Sama esklarese nia lia-fuan balun iha konferensia foin lalais liu husi karta komunikadu ne’ebé diario ne’e hetan husi gabinete vise PM nian, segunda horsehik.

Iha komunikadu ne’e mós, vise PM rezeita katak nia bandu media balu atu labele sirkula iha eventu konferensia internasionál ne’e. Nia konsidera statementu ida ne’e mós, opiniaun jornalista balu nian, la’os sai hosi nia ibun. 

“Ha’u so hatete de’it katak, se bele, labele sirkula surat tahan at ruma, ne’ebé tuir ha’u nia komprensaun hanesan selebaran iha eventu importante ba nasaun hanesan konferensia internasionál g7+ ne’e,”nia lembra konferensia liu ba. 

Vise La Sama mós lamenta media balun hakerek, nia duun ka alega jornalista balu simu suborno. Nia dehan statementu ida ne’e mós, konkluzaun ka opiniaun rasik hosi jornalista balu. 

Henesan diario ne’e fó sai iha semana ida liu ba katak La Sama deskonfia media sira públika kazu deskonfia KKN kontra Ministra Emilia, tanba hetan sogok husi ema balun ho osan montante bo’ot.

“Ha’u so triste oituan karik ema balun iha sorin ne’ebe fó osan 2 3 ribu hodi fó (media) dehan o hakerek lai ida ne’e, kona ba ida neba, hanesan sidadaun se los duni ha’u tristi tebes, tanba matebian no rai lulik mós la konkorda ida ne’e,”dehan La Sama ho espresaun duvida iha konferensia foin lalais.

“Ho laran moras tebes, ita kondena ema ida, ita tenta atu subar informasaun sira seluk, no ita tenta atu manipula fali informasaun, no ita ignora tiha katak, prosesu sira ne’ebé koalia kona ba nepostismu, tanba nepotismu la’o so bele la’o ho ema ida, tanba prosesu ne’e ami haree la’o tuir lei,”dehan La Sama iha momentu neba. 

Maibé La Sama diskorda nia deklarasaun ne’ebé media hakerek. Tuir nia katak la tuir kontiudu husi konferensia foin lalais ne’e. 

Tuir La Sama katak lia-fuan ne’ebé nia fó sai iha konferensia mak hanesan “hanesan maun ida ka hanesan katuas ida, ha’u hakarak ha’u nia alin sira sai jornalista ne’ebé mak di’ak liu tan iha futuru. Tanba ne’e, atu prevene buat ruma ne’ebé la di’ak, karik, ha’u rona ema ruma fó 2 ka 3 ribu dolar, depois husu ita hakerek buat ruma ba sira nia interese, entaun ha’u triste boot”.

Nia konsidera statementu ida ne’e, la duun ka alega jornalista ida simu suborno. Maibé nia repete katak iha momentu neba, katak, nia sei triste, karik, rona buat hanesan ne’e akontese. Karakter statementu ida ne’e, atu prevene deit, katak buat hanesan ne’e, labele akontese iha futuru. Tanba, tuir nia hanoin, nasaun ida ne’e presiza media no jornalista ne’ebé forti no kredibel. Ho nune, tentasaun sira hanesan ne’e, ne’ebé akontese iha nasaun barak, tenki prevene kedas.

“Ho ida nee, ha’u espera katak bele esklarese fila fali desentendimentu entre ha’u ho kolega jornalista sira. Nomos espera katak iha futuru parseria entre media ho governu la’o di’ak nafatin seim hamate funsaun kontrolo sosial media nian,”tenik nia liu husi komunikadu. 

Iha publikasaun diario ne’e mós hakerek kona ba vise La Sama ne’ebé sadik media atu labele asal bunyi de’it maibé tenki hakerek faktus no lialos.

Tanba, tuir nia dehan governu mós iha faktus atu hatudu ba Tribunál kona ba kazu sira ne’ebé akontese kontra Ministra Emilia, tanba sasan sira ne’ebé sosa ba nesesidade hospital nian, la’os ba interese Ministra Emilia nian.

.