La Sama Alega Jornalista Simu Subornu “TLPC-AJTL Sadik Hatudu Evidensia”

.

Jornal Nacional Diario - Sesta-feira, 01 Marsu 2013 

Timor Leste Press Club (TLPC) no Asosiasaun Jornalista Timor Leste (AJTL) sadik Vice Primeiru Ministru (PM) Fernando La Sama de Araujo hodi hatudu evidensia ba publiku relasiona ho estetmentu ne’ebe hateten, La Sama sriste se Jornalista hakerek Noticia tanba simu subornu. 

TLPC ho AJTL konsidera esteitmentu Vice Primeiru Ministru (VPM) Fernando La sama de Araujo hamonu dignidade Jornalista tanba realidade Jornalista nia kna’ar nunka iha relasaun ho orsamentu se kuandu kompara ho membru governu. 

“Ha’u hakarak hateten abertamente ba publiku katak, VPM La Sama deit mak triste, maibe haree ba La Sama nia deklarasaun nu’udar jornalista ami triste liu tan, tanba koalia konaba osan jornalista ema kasian, salariu ki’ik, maibe membru governu sira lae, iha osan boot ne’ebe la dun razuavel kuandu VPM La Sama dun jornalista simu subornu iha publikasaun Noticia,” Prezidenti Asosiasaun Jornalista Timor Leste, Tito Filipe haktuir liu husi Press konferensia, iha edifisiu TLPC, Lecidere, Kinta (28/2). 

Nu’udar jornalista ida iha estadu ida fiar ba prinsipiu estadu de dereitu demokratiku, jornalista kumpriende saida mak prinsipiu ne’e, tanba iha nsaun ida ne’e, esensial tebes iha prosesu demokratizasaun hodi kontribui ba direitu liberdade ekspresaun, hanoin, konsensia, hametin responsablidade estadu nian instituisaun sira iha sidadaun tomak, no kria plataforma pluralismu no lina ekspresaun ba grupu barak. 

Nune’e, Steitmentu ne’ebe fo sai husi Vice Primeiru Ministru La sama iha media imprime no televizaun iha edisaun foin lalais ne’e katak, deskonfia media hetan subornu, no konsidera jornal hanesan surat tahan at lalika sirkula iha konferensia G7+. 

Vice PM mos konsidera Ministra Financas Emilia Pires mak loos iha kazu sosa kama ba hospital nasional guido valadares. 

Nune’e, husu ba La sama atu hatudu faktus media ne’ebe mak hetan subornu hodi ba tuir dalan legal, asosiasaun media lamenta deklarasaun La Sama dehan, media labele akuza malu arbiru deit, maibe Vice PM La sama rasik akuza media arbiru katak media hetan subornu. 

Iha deklarasaun Vice PM La Sama mos konsidera jornal hanesan surat tahan at ne’e lalika sirkula iha konferensia, ida ne’e hatudu mo-mos hatun dignidade media Timor Leste, emfelismente esteitment ne’e mai husi liderans ajerasaun foun ne’ebe luta maka’as ba demokrasia. 

“Husu ba publiku atu kontinua hamutuk ho media hodi kombate korupsaun,” Sekretariu Jeral TLPC Jose Sarito husu. 

Hodi kontinua dehan, TLPC rezeita total deklarasaun Vice PM katak simu subornu husi ema balun hodi halo publikasaun ba kazu espesifiku, tanba ne’e, TLPC dezafia Vice PM La Sama atu hatudu faktus ba publiku. 

Nune’e, TLPC husu ba Vice Primeiru Ministru La sama atu parezenta faktus ba tribunal, karik iha faktus media hetan subornu hodi halo publikasaun ba kazu balun, tanba asaun ne’e la ajuda media atu kontribui ba kombate korupsaun. 

.