La Rezolve Problema CPD Fatuberlihu “KEFA Ameasa Lori Massa Hasoru Governu”

.

Jornal Timor Post -Sabadu, 02 Marsu 2013 

Liu husi konferensia da imprensa, Klibur Estudante Fatuberlihu (KEFA) ameasa sei lori inan ho aman sira husi fatuberlihu sei tun mai Dili hodi hasoru PM Kay Rala xanana Gusmao tanba la rezolve problema CPD-RDTL ne’ebe konsentra iha Fatuberlihu ho ilegalmente hodi halo povu ta’uk no trauma. 

Tuir Porta Voz Klibur Estudante Fatuberlihu, Emildo Ximenes ba Jornalista sira iha kampus Faspol UNTL kaikoli, Tersa (26/2) hato’o katak, bazeia ba perquiza no dialogo ne’ebe mak sira hala’o iha sub Distritu Fatuberlihu, Quiras iha dia 27-29 Dezembru 2012, populasaun sira hakarak grupu CPD-RDTL atu fila ba ida-idak nia rain hodi hala’o koperativa iha neba. 

Husu ba governu atu foti desizaun ba CPD-RDTL hodi fila ba ida-idak nia Distritu, se la’e mak sei hamosu konflitu no instabilidade nasional iha rai laran. Nia hatutan, sira (CPD-RDTL) okupa rai ho ilegalmente no la respeutu, la konsidera povu Maubere no povu ain-tanan. 

Husu mos ba Maijor jeneral F-FDTL, Lere Anan Timur atu mantein nafatin statement ne’ebe mak fo sai ona iha dia 07 de fevereiru 2013 katak, CPD-RDTL tenki fila fali ba ida-idak nia distritu. 

Sira mos la konkorda no la aseita ho lia fuan Porta Vos CPD-RDTL, Gil Fernandes nebe fo sai iha media ida 12 fevereiru 2013 katak, rai Quiras ne’e abandonadu, maibe lia ne’e la los tanba rai ne’e utilizadu husi Povu fatuberlihu rasik. Sira mos husu ba Prezidenti da Republika, Taur Matan Ruak atu deklara ba publiku, liu-liu ba povu Fatuberlihu, bazeia estatment ne’ebe mak fo sai husi Porta Voz CPD-RDTL, Gil Fernandes katak, Prezidenti da Republika mak fo apoiu no suporta maximu ba grupu CPD-RDTL nian prezensa iha Fatuberlihu. 

Husu mos ba membru governu, Parlamentu Nasional, NGO, Estudante Universitariu, wainhira atu koalia ba publiku sobre prezensa CPD-RDTL iha Fatuberlihu tenki bazeia ba faktus no halo fiskiza profundu iha fatin refere, se la’e it abele bosok. 

Husu mos ba Primeiru Ministru Kay Rala Xanana Gusmao atu foti desizaun lalais ba prezensa illegal grupu CPD-RDTL iha Sub Distritu Fatuberlihu tanba povu Fatuberlihu lakohi sira nia prezens aiha fatin ne’eba. 

“Ami mos sujere ba governu iha tempu badak nia laran, se la iha desizaun masimu hodi haruka CPD-RDTL fila ba ida-idak nia Distritu maka ami povu Fatuberlihu promto mate no fakar ran dala ida tan, tanba ami nia rain rasik,” deklara Porta Voz ne’e. 

.