“Kriteria Tender Aeroportu Suai Hamate Emprezariu Nasional”

.

Joãozito Viana

Jornal Timor Post - Tersa-feira, 05 Marsu 2013 

Kriteria ba tender aeruportu Suai ne’ebe Ministru Petroliu Rekursu Minarai (MPRM) hasai tenke iha esperensia hadia aeroportu nune’e hamate duni emprezariu nasional sira. 

“Hau haree criteria ne’ebe hasai atu hamate emprezariu nasional sira,” katak Diretor kompania Luz Clarita Alexio Cobra ba Jornalista (4/3). 

Cobra hateten, foin ukun an tinan 13, nia parte seidauk rona no haree kompania nasional balun kaer projeitu hadia aeroportu, tan ne’e nia fiar katak laiha emprejariu nasional sira, ho projeitu ne’e governu investe ho intensaun atu eduka setor privadu, maibe governu buka meus atu hamate emprezariu nasional. 

Criteria ne’e, hatutan Cobra, hatudu momos governu laiha interese ba emprezariu nasional sira, hakarak ou lakohi projeitu hadia aeroportu suai tenki involve emprezariu nasional, nune’e osan bele sirkula iha rai laran. 

 “Agora ita atu joint venture ho kompania internasional mos diak, para emprezariu nasional sira iha esperensia aprende husi sira, mas criteria ne’e hamate duni ami,” kestiaona Cobra. 

Lolos tenki Cobra, Camara Comersiu Industria Timor Leste CCI-TL tenke protesta criteria ne’ebe fo sai husi MPRM, tanba CCI-TL mak parseira ho governu. 

 Cobra promete se criteria ne’e kontinua aplika, emprezariu nasional sira, sei kontaktu ba malu halo protesta. 

Ba kestaun ne’e tuir Vice Diretur Luta Hamutuk (LH) Joao Zito Viana dehan, atu aeroportu Suai iha kualidade governu tenki aplika duni criteria adekuadu. 

“Kriteria ne’ebe fo sai husi governu katak, kompania nasional ne’ebe kaer ona projeitu aeroportu ruma, ne’e normal, nune’e bele hatn kompania ne’ebe kualidade, bazeia ba lei aprovizionamentu,” dehan Joao Zito. 

 Nia hatutan, karik kompania nasional labele tuir tanba criteria todan ne’e diretu sira nian, maibe labele hatun fali rekizitus ne’ebe governu kria, tanba ne’e atu garante kualidade obra iha aeroportu iha futuru. 

Tuir informasaun ne’ebe LH hetan, tender ba preparasaun Aeroportu Suai prepara hela ona no criteria mak tenki iha esperencia sobre ba hadia aeroportu antes.

.