Konferénsia g7+ Remata, Liberta Lalais Ki’ak

.

Jornal Independente - Husi: Eugenio Pereira - 01-03-2012 

DILI: Konferénsia Internasionál g7+ ne’ebé realiza iha Timor-Leste remata ona, nasaun ki’ak sira ne’ebé partisipa iha konferénsia ne’e kompromete atu liberta aan husi problema ki’ak iha tinan 2015. 

Iha enkontru ne’ebé hala'o husi loron 25 too 28 Fevereiru ne’e nasaun sira ne’ebé partisipa halo kompromisu boot atu implementa programa objetivu dezenvolvimentu miléniu (Milenium Development Goals-MDG’s) hodi bele lori sira nia povu sira sai husi situasaun kiak no mukit nia laran. 

Nasaun 45 ho partisipante 180 ne’ebé hola parte iha konferénsia g7+ ne’e junta ona sira nia programa katak molok 2015 sira hotu sai husi situasaun frajilidade. Primeiru Ministru Kay Rala Xanana Gusmão informa, atu realiza mehi ne’e nasaun ki’ak sira mak tenke sai na’in hodi buka meius atu rezolve sira nia problema rasik. 

“Hodi povu Timor-Leste nia naran husu atu nasaun hotu tenke lidera no tau-matan diretamente ba frajilidade ne’ebé ita nia nasaun enfrenta, hodi sai husi dezafiu sira,” dehan Xanana iha Sentru Konvensaun Dili, Kinta, (28/2). 

Atu aselera dezenvolvimentu, Xanana dehan, povu no sosiedade tomak tenke fó kontribuisaun hodi sai forsa no abut loloos atu lori nasaun no povu hakat sai husi dezafiu ba moris ne’ebé di’ak liu tan.

Xanana apela ba membru nasaun g7+ atu implementa programa prioridade sira ne’ebé junta no aprova hamutuk. 

“Enkontru g7+ ne’e di’ak liu ba ita hotu, nasaun frajil sira, tanba enkontru hira mak ita hala’o ona seidauk bele atinji mehi ida atu sai na’in ba prosesu sira ne’e, maibé ho fiar metin ita hotu hamutuk ho dalan amizade mak ita sei hetan resposta no ita hamutuk mak sei sai boot ba beibeik hodi hetan futuru ne’ebé di’ak liu tan,” deklara nia. 

PM Xanana agradese mós ba xefe estadu, membru governu no reprezentante sosiedade sira husi rai li'ur no Timor-Leste ne’ebé partisipa iha enkontru, no husu atu kontinua haboot lasu kooperasaun polítika ne’ebé sei fó benefísiu di’ak. Iha parte seluk, Xanana husu atu nasaun hotu luta makaas hasoru violénsia kontra feto iha nasaun ida-idak hodi haforsa igualdade jéneru iha mundu tomak. 

“Ita tenke hakribi ona hahalok hodi luta hasoru violénsia kontra feto sira,” nia apela. 

Entretantu lideransa nasaun g7+ sira ne’ebé partisipa iha enkontru ne’e mós deklara no promete sei implementa sira nia programa hotu ne’ebé diskute durante enkontru.

.