Kazu Prokurador VS Jornalista “Don Basilio: Tribunal Tenki Hatur Lia Loos”

,

Jornal Timor Post - Sabadu, 02 Marsu 2013 

Amu Bispu Dioseze Baucau, Don Basilio do Nasciementi, afirma, Tribunal tenki hatur lia loos ba kazu prokurador versus (VS) Jornaista nain rua husi Jornal Suara Timor Lorosa’e (STL) no Jornal INDEPENDENTE, ne’ebe Tribunal Distritu Dili (TDD) sei foti desizaun iha loron 14/03/2013. 

Don Basilio hateten, hahalok (a’at) ema ida-idak nian inklui ema bo’ot to’o kiik maka viola lei, i Tribunal mak sei tesi lia tuir lei hodi muda hahalok ema ida nia sai ba diak. 

“Tuir lojika, buat be verdade lia loos mak dehan katak, hau nia hahalok ne’ebe hau halo, ida ne’ebe ida seluk seidauk halo ne’e tenke tuir lei, Agora Sr. Prokurador defende nia a’an dehan, lia loos ne’e katak buat ne’e (notisia) bosok, Jornalista mos defende nia a’an, agora, iha ne’e Tribunal mak dehan ida ne’ebe mak koalia loos, ida ne’ebe mak koalia la loos,” hateten Don Basilio ba Jornalista sira, Sesta (01/03), iha nia kna’ar fatin relasiona ho TDD iha loron 28/02 halao julgamentu ba kazu denunsia caluniosa (memefitnah). 

Ne’ebe atual Prokurador Distritu Maliana, Jacinto Barros Soares nu’udar lejadu (korban) no Jornalista Oscar Salsinha husi STL no Raimundu Oki husi Jornal INDEPENDENTE nu’udar autor. 

Kazu ne’e to’o iha meja Tribunal, tanba lejazu sente prejudikadu ho notisia ne’ebe fo sai husi STL katak, nia simu subornu relasiona ho kazu asidente trafiku iha loron 10 Setembru 2011 iha Distritu Oekusse hodi hamate ema nain rua, nain ida kanek kman no ida seluk kanek todan, maibe wainhira kazu ne’e rejistu iha Prokuradoria Distritu, familia vitima husi asidenti ne’e hein kleur tebes no deskonfia prosesu justisa ba kazu ne’e bele taka ona no familia sira hili dalan halo publikasaun iha media. Don Basilio dehan, kestaun lia loos ne’e ema ida bele dehan ida seluk bosok. 

“Hau nia hanoin buat ne’ebe sai hanesan baZe lia loos ne’e sai loos ka la’e, kuandu ita hateten sasan tenki iha mos evidensia, Sublinha Don Basilio. Lider igreija katolika ne’e hateten, lejadu hasoru problema ne’e reazen la’os hanesan prokurador maibe hanesan sidadaun baibain ida ne’ebe senti nia naran foer. 

“Nia reazen hanesan sidadaun, tan ne’e nia senti katak nia naran foer, nia senti la diak ona kuantu mais hanesan prokurador ema ida ke ofisial justica nian tan, ne’eduni nia senti la diak, nia iha direitu atu defende nia a’an,” dehan Don Basilio. 

Iha parte seluk Don Basilio hateten, kazu kazu hanesan ne’e mosu hodi fanu liu tan Jornalista sira nia espiritu atu hala’o servisu diak liu tan nu’udar orgaun komunikasaun social neebe importante tebes iha nasaun ida hanesan mos fiskalizador.

.