Hein Governu Nia Susesu Hasoru CPD-RDTL

.

EDITORIAL JORNAL INDEPENDENTE - 6/3/2013 

  

Governu deside ona uza polisia hodi hapara atividade grupu CPD-RDTL iha distritu Welaluhu, distritu Manufahi. 

Komandante Geral PNTL Longuinhos Monteiro dehan katak nia membru polisia sira agora halo hela aprosimasaun ho CPD-RDTL oinsa atu bele fila ba ida -ida nia hela fatin original.

Polisia prontu fasilita ema CPD-RDTL ho kareta kuandu sira hakarak. 

Aprosimasaun hahu iha Domingu foin dadauk ne'e no sei kontinua hela. Meius paz ne'ebe maka polisia foti ne'e bazeia ba resolusaun Konselu Ministru nian. 

Espera katak maluk CPD-RDTL sira simu opsaun ida ne'e ho laran luak. Tenke kompriende hanoin governu nian hodi hakarak ida-ida fila ba ninia uma liu husi dalan paz nian.

Governu mos iha dalan seluk kuandu opsaun paz la hetan konkordansia husi grupu ida ne'e. Polisia sei husu CPD-RDTL obrigatoriu atu tenke fila ba ida-ida nia hela fatin.

Karik governu la konkorda ho meus kooperativa ne'ebe maka CPD-RDTL halo ne'e. Se maka lakoi kuandu kada sidadaun hakarak serbisu maka'as, inklui dezenvolve area agrikultura iha rai ida ne'e?

Serbisu maka'as nudar dalan diak ida atu kada sidadaun tenki halo hodi kontribui ba dezenvolvimentu nasional. Maibe, kuandu governu hakarak hapara atividade CPD-RDTL, ne'e karik iha buat ruma la los. 

Karik governu la kompriende lolos atividade tomak ne'ebe maka grupu ida ne'e halo. Grupu ida ne'e bele uza dalan seluk hodi ajuda nasaun. Kada ema bele serbisu maka'as hodi hadia moris iha ida-ida nia hela fatin diak liu karik. 

Diak liu kada membru fo ezemplu diak oinsa serbisu maka'as, inklui halo kooperativa iha ida-ida nia aldeia ka suku, duke ba halibur hamutuk fali iha fatin ida hodi hamosu fali perspetiva barak fali.
Tenke hare deit realidade durante ne'e katak governu nunka bandu ninia populasaun sira iha area rural sira hodi moris iha agrikultur ka serbisu iha area sira ne'ebe la kontra lei.

Entaun tenke fo apoiu ba esfosu governu, liu husi polisia, hodi resolve problema ida ne'e. Governu la hanoin a'at ba ninia povu no nasaun maibe atu ajuda ba interese povu tomak no nasaun. 

Timor-Leste sei lao diak liu tan kuandu povu tomak sempre fo apoiu ba hanoin diak sira ne'ebe maka mai husi estadu. Nasaun ida ne'e sei labele lao diak kuandu kada sidadaun halao nia moris tuir ninia hakarak deit, laos tuir lei. 

Maibe, iha fiar metin katak Timoroan sempre iha vontade diak hodi lori rai ida ne'e ba oin. Timoroan sempre hakarak sai moris diak duni iha tempu ida. Ita hein.

.