“Governu Propoin Miloens U$1.200 Hadi’a Ro KN”

.

Jornal Timor Post - Segunda-Feira, 04 Marsu 2013 

Ministeriu Defeza Seguransa (MDS), liu husi Sekretariu Estadu Defeza (SED) propoin ona milloens U$1.200 ba halo manutensaun ro komponente Naval (KN) rua ne’ebe mak a’at hela. 

 “Ita nia ro iha ne’e fo perioridade atu halo manutensaun ba roa rua ne’ebe mak sosa iha Xina, tanba ne’e mak ita tau osan Miloens U$1.200 iha tinan ida ne’e hosi hadi’a ona,” lia hirak ne’e hato’o husi SED, Julio Thomas Pinto ba Timor Post iha komponente Naval, Sesta (01/3). Atu hadia ro ne’e iha opsaun rua, ida, kompania ne’e mai hadi’a iha ne’e (Timor), se la’e, opsaun seluk maka haruka ba Australia no Indonezia. 

“Agora dadaun ita nia tekniku KN halo uluk inspensaun, maibe seidauk tau kustu ba iha ne’eba, tanba ne’e, F-FDTL sei desidi para haruka kompania ida mai tau kustu ba, depois mak ita loke ba tender hodi halo manutensaun, iha tinan ida ne’e governu nia obrigasaun tenki halo duni manutensaun bar o rua ne’e, tanba importante tebe-tebes,” Julio Informa. 

 Aleinde ne’e mos sekretariu Estadu halo observasaun ba kompania ne’ebe mak ateru hela tasi iha KN Hera, kompania agora dadaun ateru hela tasi iha sori-sorin ho luan metrus 200, maibe foin lalais ne’e komandante KN hato’o proposta ida haluan tan metrus 200. 

 “Hau mai haree para halo relatoriu ida ba Ministeriu Defeza Seguransa, se ita ateru ona tasi ne’eba agora dezenu hela atu halo tenderizasaun edifisiu ba komandu KN nian hotu ona no hein halo aprezentasaun ba F-FDTL iha KN, sira konkorda ka lae dezenu ne’e, depois mak halo tenderizasaun ba edifisiu komando KN,” nia dehan. 

,