“FRETILIN: Korupsaun Buras Tanba Hakarak Riku Lalais”

.

Jornal Nacional Diario - Kinta-feira, 28 Fevereiru 2013 

Bancada Opozisaun FRETILIN iha Parlamentu Nasional (PN), konsidera korupsaun ne’ebe buras los iha Timor Leste ne’e tanba maioria Timor oan hotu hakarak buka riku lalais hodi naok osan estadu nian.

Tuir deputadu Joaquim dos Santos, husi Bancada FRETILIN katak, atu hamenus korupsaun, estadu tenki halo lei ida rogorozo no oinsa hadia povu nia moris husi familia hotu-hotu hodi labele destingi ida ho ida seluk. 

“Korupsaun ne’e mosu tanba maioria ema Timor oan hotu kan ten no buka riku lalais, ema seluk iha kareta nia mos hakarak hola kareta, ema seluk iha motor nia mos hakarak iha motor maske nia osan laiha, entaun nia tenki halai ona ba dalan korupsaun ne’e, no balun mos kanten, kabun ne’e kiikoan hela maibe hakarak han fali karau boot ida nia hahan, ne’e mak problema,” dehan Joaquim dos santos (27/2) iha PN. 

Nia hatutan, Politika FRETILIN nia ne’e maka hakarak nasaun ne’e sai hanesan nasaun forte no saudavel, atu nune’e ema hotu-hotu bele goza ukun an ida ne’e, liu-liu labele iha diskriminasaun social. 

“Iha tinan lima ba kotuk ne’e ema ne’ebe riku liu iha Timor ne’e laos povu, i laos mos sira ne’ebe uluk halo funu ne’e, maibe grupu oportunista maka agora mobiliza hela iha capital Dili ne’e, maka kait ba eskerda, kait ba direta, dehan katak nia mak agora matenek liu iha Timor, hau hakarak husu, tinan lima nia laran ne’e osan sira ne’e ba hotu ne’ebe?,” dehan Joaquim. 

Nia hatutan, se ema Timor oan hotu bele kontrola nia an para labele kanten, korusaun sei laiha, FRETILIN mos preokupa duni atu rezolve korupsaun ne’e, maibe atu rezolve kan ten ne’e laos fasil, tenki fila fali ba ema ida-idak ninia konsensia. 

 “Dala ruma ema balun dehan tenki aproveita kedas kesempatan dalam kesempitan, ida ne’e mos problema boot ida,” tenik Joaquim. 

,