“FRETILIN Husu Governu Halo Remodelasaun”

.

Jornal Timor Post - Kuarta-Feira, 20 Marsu 2013 

Membru Deputadu husi bancada Opozisaun FRETILIN husu ba governu atu halo remodelasaun estrutura V Governu konstitusional hodi nune’e bele tebe sai MInistru ho Sekretariu Estadu balun ne’ebe laiha kapasidade atu solusiona problema ne’ebe povu infrenta. 

Haree ba ezekusaun orsamentu retifikativu, membru governu sira to’o oras ne’e seidauk solusiona problema ne’ebe povu infrenta maka hatudu katak, iha Ministeriu balun kontinuasuan husi IV governu laiha kapasidade. 

 “Hau husu ba ita hotu, liu-liu Parlamentu Nasional hanesan uluk hau rekomenda tiha ona buka rezolusaun ida para obriga governu bele foti medidas, ne’eduni, governu tenki remodela situasuan balun iha estrutura governu ba Ministru sira ne’ebe laiha kapasidade,” deputadu Joquim dos santos hato’o kestaun ne’e iha meza plenaria Parlamentu Nasional, Tersa (19/3). 

Tuir deputadu Joquim katak, dala barak membru governu sira hakarak koalia ba publiku maibe seidauk iha provas ba verbasidade assuntu ruma entaun lori ita ba situasaun konflitu ne’ebe produs efeitus negativu ba sidadaun nia interese. 

 “Entaun halo ita iha PN mos lakon autoridade ba situasuan ne’ebe emerjensia hanesan akontese Prezidenti Republika atu ba Roma,” nia lamenta. 

Ho nune’e, nia konsidera lideransa iha rai ne’e desrespeita ona valor kultura Timor nian, hanesan festa boot ida foin lalais iha Tasi Tolu, ne’e hatudu ona ita nia dezovidensia ona regras, maibe tinan 10 ona deputadu sira sempre hakilar beibeik hodi respeita lei no konstituisaun, tanba ne’e mak ita fraku atu harii nasionalizmu. 

Durante ne’e, deputadu ne’e mos rejista katak, dala barak ida subtitui sira halo sala maibe sira la brani atu foti medidas, sira admiti konspirasaun no nepotizmu iha instituisaun laran. 

Nune’e mos, Deputadu Mateus de Jesus husi bancada CNRT hateten katak, atu halo remodelasaun ou lae, ne’e kompetensia governu ninia, tuir nia, kuandu koloka ema ida ba tur iha pozisaun Ministru ka sekretariu Estadu antes governu haree ona ninia kapasidade atu lidera instituisaun estadu nian hodi servi ba povu. 

“Remodelasaun ne’e lei fo dalan, maibe ita tenki iha evidensia forte katak, member governu ida ne’e laiha kbi’it liu atu assume kargu ida hanesan servidor povu maka bele halo remodelasaun,” deputadu Mateus hateten. 

.