“Familia Matebian Armindo Triste Ho Justisa”

.

Jornal Nacional Diario - Tersa-feira, 05 Marsu 2013 

Familia matebian Armindo Pereira ne’ebe hetan tiru husi membru Polisia Nasional Timor Leste (PNTL) iha Suku Hera, Distritu Dili, tinan kotuk, triste boot ho prosesu justisa ba arguido ne’ebe to’o ohin loron seidauk hetan nia rejultadu. Iha segunda (4/3), Tribunal Distrital Dili (TDD) hadia hikas tan prosesu julgamentu ba kazu homesidu ne’ebe envolve membru PNTL nian rua ho inisial M ho A. 

TDD hola desizaun adia primeira julgamentu ba kazu homesidu ne’e, tanba Ministeriu Publiku ne’ebe reprezenta husi Prokurador Jose Landin moras no subtitui fali Prokurador seluk, maibe prokurador refere seidauk estuda prosesu ne’e, tanba ne’e kazu ne’e adia fali ba fulan Abril, tinan ne’e. 

 Familia matebian Armindo nian mos triste liu tan tanba arguido nain rua sei moris livre hela iha liur. 

“Hau hanesan matebian nia maun la simu ho atetude ida ne’e, karik nia prosesu lao neneik ba mos ami familia hakarak, ema sira ne’ebe oho ona ami nia alin ne’e epluamenus nia detein ona iha prizaun,” afirma Abel Ximenes nudar matebian nia maun ba jornalista sira iha TDD, segunda (4/3). 

Familia matebian sei esforsu hodi fo kontribuisaun ba prosesu julgamentu ne’e, nune’e bele hetan justisa ne’ebe lolos ba sira hanesan familia husi vitima. 

Abel mos husu ba Polisia sira atu tau matan nafatin ba arguidu nain rua ne’e, tanba Abel tauk bainhira buat ruma akontese ba arguidu nain rua ne’e, ema balun bele deskon fia fali ba familia matebian mak tenta halo buat ruma ka tenta hanoin at ba arguidu. 

Oras ne’e dadaun arguidu nain rua ne’e husik ona sira nia profisaun hanesan PNTL, hahu kedas iha tinan kotuk bainhira Ministeriu Publiku akuza ona sira nain rua hanesan arguidu. 

“Hanesan familia vitima, importante ba ami mak justisa ne’ebe justu no imparsial,” hateten Abel Ximenes. 

,