“Deputadu Protesta Plenaria Ho Portugues”

.

Jornal Timor Post - Kuarta-feira, 06 Marsu 2013 

Intervensaun plenaria Tersa, (5/3) ho lian portugues hamosu protesta husi deputadu sira tanba konsidera halakon informasaun ba povu liu husi kobertura Jornalista ne’ebe maioria hakerek notisia ho lian tetun. 

Prezidenti Komisaun A ne’ebe trata asuntu konstituisaun, Justisa, Administrasaun Publiku, Poder lokal no anti korupsaun katak, debate iha Parlamentu nasional ne’ebe uza lian portugues povu barak sai la komprende saida mak reprezetante povu deskute iha meza. 

“Ita nia povu sira presiza hatene informasaun, maibe ita debate ho lian portugues, media sira la dun komprende atu hakerek hodi publika sai,” deputada Carmelita Moniz hato’o lamentasaun ne’e iha meja plenaria PN, (5/3). 

Maske deputada ne’e hato’o ninia intervensaun iha lian portugues, maibe antes ne’e Prezidenti fo oportunidade hato’o ho lian tetun maibe ko’alia dala rua iha lian tetun, Prezidenti meja interven kedas la premite koalia iha debate. 

Nune’e mos Xefe bancada FRETILIN, Aniceto Guterres hateten, debate ne’ebe uza lian portugues tenki halo rezumu iha lian tetun para iha balansu tanba lian ofisial iha rua, Tetun ho Portugues para publiku hotu bele komprende. 

Nia sujere, relasiona ho aprjentasaun husi Prokuradoria Jeral da Republika halo aprezentasaun ho lian portugues, maibe la iha rezumu ho lian Tetum povu barak la komprende. 

Hatan ba lamentasoens ne’e, iha meja plenaria Prezidenti Parlamentu Nasional Vicente Guterres hatete, membru deputadu hotu tenki kumpri regras kuandu debate ho lian Portugues labele koalia fali lian Tetun. 

Enkuantu, tuir observasaun debate horsehik hahu tuku 09:30 Otl to’o remata, ambiente debate ho lian Portugues, deutadu balun sei kaku ko’alia lian portugues hodi hato’o sira nia intervensaun bazeia ba fiskalizasaun ne’ebe hala’o iha baze. 

.